Koulibaly ថ្លៃពេក! Man City កំពុងបង្វែររ៉ាដាទៅរកជម្រើសជាតិព័រទុយកាល់រូបនេះវិញហើយ

បរទេស៖ ក្លិបមេឃខៀវ Manchester City កំពុងតែព្យាយាមទិញយកខ្សែការពារឆ្នើមម្នាក់ទៀតមករួមក្រុមនៅក្នុងទីផ្សារដោះដូរកីឡាកររដូវក្ដៅនេះ។ ក្នុងនោះកីឡាករ Kalidou Koulibaly គឺជាគោលដៅដ៏ធំមួយដែលក្លិបលោក Pep Guardiola តាមចរចាទិញពីក្លិប Napoli ជាច្រើនសប្តាហ៍មកហើយ។ 

ប៉ុន្តែដោយសារ Napoli ទាមទារតម្លៃខ្លួនកីឡាករវ័យ២៩ឆ្នាំរូបនេះថ្លៃពេកពោលគឺប្រមាណ៧២លានផោន (ឬ៩២លានដុល្លារ) ទើបធ្វើឲ្យមានភាពជាប់គាំងដូចពេលនេះ។ ដោយឡែក Man City ក៏បានបើកកិច្ចចរចាជាមួយគោលដៅផ្សេងទៀតផងដែរគឺកីឡាករ Ruben Dias របស់ក្លិប Benfica ។ 

គួរឲ្យដឹងដែរ Benfica ទាមទារតម្លៃខ្លួនតារាវ័យ២៣ឆ្នាំរូបនេះ សមស្របនឹងអ្វីដែល Man City ហ៊ានចំណាយឲ្យ Napoli ពោលគឺប្រមាណ៥០លានផោន (ឬ៦៤លានដុល្លារ)។ លើសពីនេះក្លិបលោក Pep Guardiola ក៏ចង់បញ្ជូលខ្សែការពាររបស់ខ្លួនម្នាក់គឺកីឡាករ​ Nicolas Otamendi នៅក្នុងសំណើនោះផងដែរដើម្បីកាត់បន្ថយតម្លៃខ្លះ៕

ប្រភព៖ sportsmole