ខាទូម៖ អង្គការសហប្រជាជាតិបានឱ្យដឹងកាលពីថ្ងៃព្រហស្បតិ៍ថា ប្រជាជនជិត ៨៣ម៉ឺននាក់នៅទូទាំងប្រទេសស៊ូដង់ បានរងផលប៉ះពាល់ធ្ងន់ធ្ងរដោយសារបញ្ហាទឹកជំនន់អស់រយៈពេលជាច្រើនខែ។ ការិយាល័យអង្គការសហប្រជាជាតិដើម្បីសម្របសម្រួលកិច្ចការមនុស្សធម៌ប្រចាំប្រទេសស៊ូដង់បានរាយការណ៍ថា ផ្ទះសម្បែងពលរដ្ឋជិត ១៦៦,០០០ខ្នង ត្រូវខូចខាតឬរងការបំផ្លាញទាំងស្រុង ដោយសារតែទឹកជំនន់ដែលបានវាយប្រហារមកលើប្រទេសមួយនេះ ចាប់តាំងពីពាក់កណ្តាលខែកក្កដាកន្លងមក។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សពលរដ្ឋស៊ូដង់ចំនួន ១២៤នាក់បានស្លាប់ និង ៥៤នាក់ បានរងរបួសដោយសារទឹកជំនន់នេះ។ យោងតាមរបាយការណ៍ទីភ្នាក់ងាររបស់អង្គការសហប្រជាជាតិបានឱ្យដឹងទៀតថា ជាងពាក់កណ្តាលនៃអ្នកដែលរងផលប៉ះពាល់ដោយទឹកជំនន់គឺស្ថិតក្នុងរដ្ឋចំនួន៥ នៃរដ្ឋចំនួន ១៨របស់ស៊ូដង់ ដោយក្នុងនោះរួមមាន រដ្ឋ North Darfur, Khartoum, Blue Nile, West Darfur និងរដ្ឋ Sennar ។
គួរជម្រាបដែរថា ភ្លៀងធ្លាក់ខ្លាំងនៅប្រទេសស៊ូដង់ តែងកើតមានឡើងចាប់ពីខែមិថុនា ដល់ខែតុលារៀងរាល់ឆ្នាំ។ ហើយស្របពេលប្រទេសកំពុងជួបវិបត្តិគ្រោះធម្មជាតិនេះ រដ្ឋាភិបាលស៊ូដង់និងអង្គការសហប្រជាជាតិ បានជម្រុញឱ្យប្រជាជនត្រូវមានការប្រុងប្រយ័ត្នខ្ពស់ ដើម្បីការពារខ្លួនពីគ្រោះថ្នាក់ផ្សេងៗ ក៏ដូចជាការពារខ្លួនពីជំងឺរាតត្បាតកូវីដ១៩៕