ផ្លូវការ! Barcelona ព្រមព្រៀងលក់ Suarez ឲ្យទៅក្លិបគូប្រជែង At.Madrid ហើយ ក្នុងតម្លៃ…

អេស្ប៉ាញ៖ ក្លិបអ្នកមានបុណ្យ Barcelona បានធ្វើការបញ្ជាក់ថា ខ្សែប្រយុទ្ធរបស់ខ្លួនកីឡាករ Luis Suarez នឹងចូលរួមជាមួយក្លិប Atletico Madrid បន្ទាប់ពីក្លិបយក្សអេស្ប៉ាញទាំងពីរ បានឈានដល់កិច្ចព្រមព្រៀងក្នុងការផ្ទេរជើងស៊ុតវ័យ៣៣ឆ្នាំរូបនេះ។

ក្លិប At.Madrid នឹងត្រូវចំណាយឲ្យ Barca ចំនួន៦លានអឺរ៉ូ (ឬប្រមាណ ៦,៩លានដុល្លារ) សម្រាប់ការផ្ទេរយក ខ្សែប្រយុទ្ធដែលចំណាយពេល៦ឆ្នាំនៅទឹកដី Camp Nou។

ក្នុងមួយរយៈចុងក្រោយ Suarez មានដំណឹងលេចឮច្រើនទាក់ទង ទៅនឹងការផ្លាស់ទៅចូលរួមជាមួយក្លិបសេះបង្កង់ Juventus ប៉ុន្តែការផ្ទេរត្រូវបរាជ័យដោយសារតែ មានបញ្ហារឿងប្រលងចូលសញ្ជាតិអ៊ីតាលី។ ដែលជាហេតុធ្វើឲ្យគេបង្វែរទៅចូលរួមជាមួយ At.Madrid វិញ។

ជាមួយគ្នានេះ បើយោងតាមរបាយការណ៍របស់កាសែត BBC ជើងស៊ុតសញ្ជាតិអ៊ុយរ៉ាហ្កាយសុខចិត្តកាត់បន្ថយប្រាក់ពលកម្មរបស់ខ្លួនដើម្បីចូលរួមជាមួយក្រុមលោក Diego Simeone ពោលគឺគេទទួលបានខ្ទង់១៥លានអឺរ៉ូក្នុង១ឆ្នាំ ស្មើនឹងពាក់កណ្ដាលនៃប្រាក់ពលកម្មដែលគេធ្លាប់ទទួលបានកាលនៅ Barcelona ។

គួររម្លឹកដែរថា Suarez ជាកីឡាករដែលរកគ្រាប់បានច្រើនជាងគេលំដាប់ទី៣ ប្រចាំប្រវត្តិសាស្ត្រក្លិប​ Barcelona តួយ៉ាងចាប់តាំងពីផ្លាស់ពីក្លិបហង្សក្រហម Liverpool មកកាន់ទឹកដី Camp Nou ក្នុងឆ្នាំ ២០១៤មក គេស៊ុតបាន១៩៨គ្រាប់ ក្នុងនោះដែរគេជួយក្លិបយក្សតំបន់កាតាឡាន់ លើកពាន La Liga បាន៤ដង និង ពាន Champions League ១ដង ៕

ប្រភព៖ goal.com