វី ឌីណែត និង ឈីន រតនៈ ប្រកៀកប្រកិតគ្នាខ្លាំងក្នុងឱកាសដណ្តើមយកពាន I Am a Singer Cambodia

ភ្នំពេញ៖ នារាត្រីថ្ងៃសៅរ៍សប្តាហ៍នេះ កម្មវិធីប្រលងតារាចម្រៀងអាជីព I Am a Singer Cambodia នឹងឈានទៅដល់វគ្គផ្តាច់ព្រ័ត្រហើយ ដើម្បីស្វែងរកម្ចាស់ពានមួយរូបប្រចាំរដូវកាលទី២ ដែលជាការជ្រើសរើសពីសំណាក់ទស្សនិកជនទូទាំងប្រទេស។

អ្វីដែលគួរចាប់អារម្មណ៍ពីកម្មវិធីប្រលងមួយនេះ សង្កេតឃើញថា តារាចម្រៀង វី ឌីណែត និង ឈីន រតនៈ តែងតែទទួលបានការ Vote ពីសំណាក់មហាជនច្រើនជាងគេលំដាប់ទី១ និងទី២ យ៉ាងប្រកៀកប្រកិតគ្នាខ្លាំងមែនទែននាប៉ុន្មានសប្តាហ៍ចុងក្រោយនេះ។ ចំណុចនេះហើយ ទើបគេអាចសន្និដ្ឋានបានថា រវាងតារាចម្រៀងស្រីសំឡេងខ្លាំងទាំងពីររូបនេះ ប្រាកដជាមានម្នាក់ដែលនឹងក្លាយជាម្ចាស់ពានប្រចាំរដូវកាលទី២នេះ។

សូមបញ្ជាក់ផងដែរថា ក្រៅពីតារាចម្រៀងស្រីទាំងពីរខាងលើ ក៏នៅមានវត្តមានតារាចម្រៀងអាជីព ៥នាក់ផ្សេងទៀតដែលត្រៀមនឹងបញ្ចេញសមត្ថភាពក្នុងវគ្គចុងក្រោយនៃកម្មវិធីដែលមានដូចជា៖ លោក ឃុន វុត្ថា កញ្ញា តាក់ម៉ា លោក គង់ ចំរើន កញ្ញា ប៉ាច គីមមួយ និងលោក សំ សុវណ្ណារ៉ាក់។

យ៉ាងណាមិញ ចំពោះលទ្ធផលក្នុងការស្វែងរកម្ចាស់ពានថ្មីនេះ យើងនៅមិនទាន់អាចដឹងថានឹងមានការប្រែប្រួលពិន្ទុខុសទាំងស្រុងពីជុំទី១ ឬយ៉ាងណាទេ ដូច្នេះមានតែរង់ចាំអ៊ុតមើល និងសាទរទាំងអស់គ្នាសម្រាប់ជុំទី២ នៃវគ្គផ្តាច់ព្រ័ត្រនារាត្រីថ្ងៃសៅរ៍សប្តាហ៍នេះ៕

សូមទស្សនារូបភាពខាងក្រោម៖