គ្នាយើងមួយចំនួនទំនងជាធ្លាប់ជួបអាការៈបែកញើសនៅបាតដៃ ហើយដឹងថាវារំខានយើងយ៉ាងណាផងដែរ។ អាការៈបែកញើសនៅបាតដៃនេះអាចបណ្ដាលមកពីមូលហេតុច្រើនយ៉ាងដែលគ្នាយើងគួរស្វែងយល់ និងថាតើវាមានគ្រោះថ្នាក់ ឬអត់? ខាងក្រោមនេះជាមូលហេតុមួយចំនួនអាចនាំឲ្យមានបញ្ហាបែកញើសបាតដៃនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស១. បញ្ហាផ្លូវអារម្មណ៍
បើគ្នាយើងជួបបញ្ហាថប់បារម្ភ ស្រ្តេស ឬភ័យស្លន់ស្លោជាដើមនោះ គឺសុទ្ធតែអាចនាំឲ្យយើងជួបបញ្ហាបែកញើសនៅបាតដៃនេះដូចគ្នា។
អ្នកជំនាញពន្យល់ថាពេលយើងមានអារម្មណ៍មិនស្រួលចិត្ត ឬស្រ្តេសខ្លាំង នឹងធ្វើឲ្យយើងមានអាការៈបែកញើសនៅបាតដៃនេះដែរ។ មួយវិញទៀតបើយើងជួបបញ្ហាថប់បារម្ភ ក៏ដូចគ្នាដែរ បញ្ហានេះបានធ្វើឲ្យមនុស្សជាច្រើនមានអាការៈចេញញើសនៅបាតដៃ។ ដូចគ្នាដែរ បើយើងជួបរឿងរន្ធត់ណាមួយ ធ្វើឲ្យយើងភ័យស្លន់ស្លោ នោះក៏អាចនាំឲ្យយើងបែកញើសនៅដៃដែរ ដោយថាមកពីរាងកាយយើងឆ្លើយតបទៅនឹងគ្រោះថ្នាក់ដែលនឹងអាចកើតមានឡើង។
២. កត្តាបរិស្ថាន
នៅពេលមានអាកាសធាតុក្ដៅ ឬសើម សុទ្ធតែជាដើមចមនាំឲ្យយើងជួបបញ្ហាចេញញើសនៅបាតដៃនេះដូចគ្នា។ មិនថានៅក្លៀក ក ឬបាតដៃទេ ពេលអាកាសធាតុក្ដៅ គឺអាចជាហេតុផលនាំឲ្យយើងចេញញើសនៅកន្លែងទាំងនេះបាន។
៣. អាហារហូបចុក
របបអាហារមិនត្រឹមត្រូវក៏អាចនាំឲ្យយើងជួបបញ្ហាញើសនៅបាតដៃនេះដូចគ្នា។ បើយើងញ៉ាំខ្ទឹមស ខ្ទឹមបារាំង ឬអាហារហឹរៗ គឺសុទ្ធជាដើមហេតុធ្វើឲ្យយើងបែកញើសបាន។ មួយវិញទៀត បើយើងជាអ្នកចូលចិត្តផឹកគ្រឿងស្រវឹង និងជក់បារី ទៀតនោះ សារធាតុនៅក្នុងរបស់ទាំងនេះនឹងជំរុញឲ្យក្រពេញញើសផលិតញើសកាន់តែច្រើន និងធ្វើឲ្យមានញើសនៅបាតដៃផងដែរ។
៤. អតុល្យភាពអ័រម៉ូន
អតុល្យភាពអ័រម៉ូនអាចធ្វើឲ្យប៉ះពាល់ដល់អារម្មណ៍ និងវដ្ដរដូវរបស់ស្រីៗ ហើយវាក៏អាចប៉ះពាល់ដល់ខាងចុងប្រព័ន្ធប្រសាទ ដែលជំរុញក្រពេញញើសផលិតញើស។ ដូចនេះ បើយើងមានជំងឺក្រពេញទីរ៉ូអ៊ីត និងបញ្ហាអ័រម៉ូនផ្សេងៗទៀត វានឹងធ្វើឲ្យយើងជួបបញ្ហាបែកញើសនៅបាតដៃដូចគ្នា។
អ្នកជំនាញណែនាំឲ្យទៅជួបពេទ្យ បើយើងមានបញ្ហានេះ និងថាបញ្ហានេះមិនពិបាកក្នុងការព្យាបាលនោះទេ។ មួយវិញទៀត អ្នកជំនាញណែនាំឲ្យសម្អាតដៃឲ្យបានស្អាតជានិច្ចផងដែរ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
អត្ថបទផ្ដល់សិទ្ធិដោយ Hello Krupet