យ៉េរូសាឡឹម៖ នាយករដ្ឋមន្រ្តីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានថ្លែងកាលពីថ្ងៃអាទិត្យ ទី ១៣ ខែកញ្ញាថា ប្រទេសអ៊ីស្រាអែលទាំងមូលនឹងត្រូវប្រកាសវិធានការបិទទ្វារប្រទេសរយៈពេល ៣សប្តាហ៍ ដែលនឹងចាប់ផ្តើមពីថ្ងៃសុក្រសប្តាហ៍នេះ ដើម្បីទប់ស្កាត់រលកទី២ នៃជំងឺរាតត្បាតកូវីដ១៩។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សអំឡុងពេលវិធានការបិទទ្វារប្រទេសនេះ ពលរដ្ឋអ៊ីស្រាអែលទាំងអស់នឹងមិនត្រូវអនុញ្ញាតឱ្យធ្វើដំណើរចេញឆ្ងាយពីផ្ទះលើស ៥០០ម៉ែត្រនោះឡើយ។ សាលារៀន ក៏ដូចជាហាងនានានឹងត្រូវបិទទ្វារ ប៉ុន្តែផ្សារទំនើប និងឱសថស្ថាននឹងនៅតែបើកដំណើរការដដែល។ វិស័យសាធារណៈនឹងត្រូវអនុញ្ញាតឱ្យបើកដំណើរការជាមួយចំនួនបុគ្គលិកតិចជាងមុន ចំណែកការិយាល័យអង្គការក្រៅរដ្ឋាភិបាល រួមទាំងការិយាល័យអាជីវកម្ម នឹងមិនចាំបាច់ត្រូវបិទទ្វារឡើយ ប្រសិនបើមិនមានផ្តល់សេវាកម្មទទួលអតិថិជន។ បន្ថែមពីនេះ នៅតាមទីកន្លែងផ្សេងៗទៀត នឹងមិនអនុញ្ញាតឱ្យមានការជួបជុំគ្នាលើសពី ២០នាក់ឡើយ។
គួរឱ្យដឹងដែរថា អ៊ីស្រាអែលធ្លាប់ចេញវិធានការបិទទ្វារប្រទេសម្តងរួចទៅហើយកាលពីខែមេសា។ ប៉ុន្តែនៅពេលករណីឆ្លងបានថយចុះ ហើយរដ្ឋាភិបាលបើកទ្វារប្រទេសស្តាសេដ្ឋកិច្ចជាតិឡើងវិញ ស្រាប់តែករណីឆ្លងថ្មីបានកើនខ្លាំងជាបន្តបន្ទាប់ ដែលគិតរហូតមកពេលនេះ អ៊ីស្រាអែលមានជំងឺកូវីដ១៩ជាង ១៥ម៉ឺននាក់ និងអ្នកស្លាប់ជាង១ពាន់នាក់៕