អាមេរិក៖ អភិបាលរដ្ឋ លោក Kate Brown បាននិយាយថា មានមនុស្សរាប់សិបនាក់កំពុងបាត់ខ្លួន នៅក្នុងរដ្ឋអូរីហ្គុនតែឯង ខណៈដែលភ្លើងឆេះព្រៃបានបន្តរាលដាលពាសពេញតំបន់ US West Coast។ អគ្គិភ័យបានឆាបឆេះនៅរដ្ឋកាលីហ្វ័រញ៉ា អូរីហ្គុន និងវ៉ាស៊ីនតោន អស់រយៈពេល៣សប្ដាហ៍ហើយ។

ដោយមានខ្យល់បក់ខ្លាំងចំពេលមានកម្ដៅខ្លាំង អគ្គិភ័យបានឆាបឆេះលើផ្ទៃដីរាប់លានអារ បំផ្លាញផ្ទះរាប់ពាន់ខ្នង និងសម្លាប់មនុស្សយ៉ាងតិច២៥នាក់។ អភិបាលរដ្ឋកាលីហ្វ័រញ៉ា លោក Gavin Newsom បាននិយាយថា ការជជែកដេញដោលគ្នាជុំវិញការប្រែប្រួលអាកាសធាតុ គឺចប់ហើយ។

អគ្គិភ័យបានឆាបឆេះព្រៃដីសរុប៤.៥លានអារ ដែលជាតំបន់ធំជាងរដ្ឋ Connecticut និងតូចជាងប្រទេសវ៉ែលបន្តិច នៅប៉ុន្មានសប្ដាហ៍ថ្មីៗនេះ នេះបើយោងតាមមជ្ឈមណ្ឌល National Interagency Fire Center។ ការបំពុលផ្សែងចេញពីភ្លើងឆេះព្រៃបានធ្វើឲ្យទីក្រុងធំបំផុតរបស់រដ្ឋអូរីហ្គុន គឺ Portland មានគុណភាពខ្យល់អាកាសអាក្រក់បំផុតនៅលើពិភពលោក បន្ទាប់មកគឺទីក្រុង San Francisco និង Seattle នេះបើយោងតាមគេហទំព័រ IQAir.com។

អ្នកនាំពាក្យសេតវិមាន លោក Judd Deere បានប្រកាសនៅលើបណ្ដាញសង្គម Twitter កាលពីថ្ងៃសៅរ៍ថា ប្រធានាធិបតី ដូណាល់ ត្រាំ នឹងធ្វើទស្សកិច្ចនៅរដ្ឋកាលីហ្វ័រញ៉ា នៅថ្ងៃចន្ទ៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក សង្គម និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]