កាន់តែធ្ងន់ធ្ងរ! ថ្ងៃនេះឥណ្ឌារកឃើញអ្នកឆ្លងកូវីដ១៩ថ្មីជិត១០ម៉ឺននាក់

ញូដេលី៖ យោងតាមទិន្នន័យ​របស់ក្រសួងសុខាភិបាល​ឥណ្ឌាបានបង្ហាញ​ថា នៅថ្ងៃ​សៅរ៍ ទី១២ ខែកញ្ញានេះ ​​ប្រទេសឥណ្ឌាបានរកឃើញអ្នកឆ្លងជំងឺកូវីដ១៩ថ្មី​ចំនួន ៩៧,៥៧០នាក់​បន្ថែមទៀត ដែលធ្វើឱ្យតួលេខអ្នកឆ្លងសរុបឡើងដល់ ៤.៦លាននាក់។ បច្ចុប្បន្ន​​ឥណ្ឌា​​​បានឡើងឈរនៅចំណាត់ថ្នាក់ទី២ ​ក្លាយជាប្រទេស​មានករណីឆ្លងជំងឺច្រើនបំផុត គឺបន្ទាប់ពីសហរដ្ឋអាមេរិក ដែលមានអ្នកឆ្លង ៦.៦លាននាក់។

យោងតាមក្រុមមន្រ្តីរដ្ឋាភិបាល និងអ្នកជំនាញឥណ្ឌាបានឱ្យដឹងថា ទីតាំងដែលរងគ្រោះខ្លាំងបំផុតដោយសារជំងឺកូវីដ១៩ក្នុងប្រទេសឥណ្ឌានៅពេលនេះ គឺស្ថិតនៅក្នុងរដ្ឋ Maharashtra ជាមួយ​ចំនួនអ្នកឆ្លងកើនឡើងជិតដល់១លាន​នាក់​ គិតត្រឹមថ្ងៃសុក្រសប្តាហ៍នេះ។ ហើយមូលហេតុដែល​ធ្វើឱ្យ​ករណីឆ្លងកើនឡើង​ គឺទំនង​បណ្តាលមកពីសកម្មភាពបើកដំណើរការសេដ្ឋកិច្ចជាតិឡើងវិញ ការអនុញ្ញាតឱ្យមានរៀបចំពិធីបុណ្យ ក៏ដូចជាការបន្ធូរបន្ថយវិធានការពារជំងឺជាដើម៕