បាក់អណ្តូងរ៉ែមាសមួយនៅកុងហ្គោ បណ្តាលឱ្យមនុស្សស្លាប់​យ៉ាងតិច៥០នាក់

ប្រាសាវីល៖ យ៉ាងហោចណាស់មានមនុស្សចំនួន ៥០នាក់ ត្រូវគេសន្មត់ថាបានស្លាប់បាត់បង់ជីវិត ក្នុងហេតុការណ៍បាក់​អណ្តូងរ៉ែមាសមួយ នៅក្បែរតំបន់ទីប្រជុំជន Kamituga ស្ថិតនៅភាគ​ខាងកើតនៃសាធារណរដ្ឋប្រជាធិបតេយ្យកុងហ្គោ។

អាជ្ញាធរកុងហ្គោបានឱ្យដឹងថា ហេតុការណ៍បាក់អណ្តូងរ៉ែនេះ បានកើតឡើងកាលពីថ្ងៃសុក្រ ប្រហែលម៉ោង៣រសៀល (ម៉ោងនៅកុងហ្គោ) បន្ទាប់ពីមានភ្លៀងធ្លាក់ខ្លាំង។​ ហើយមនុស្សទាំង​អស់នៅក្នុងនោះ គឺមិនទាន់ឃើញអ្នកណាម្នាក់អាចចេញរួចឡើយ។

គួរឱ្យ​ជម្រាបដែរថា ហេតុការណ៍បាក់អណ្តូងរ៉ែ​​នៅក្នុងប្រទេសកុងហ្គោ គឺតែងតែកើតមានឡើងបន្តបន្ទាប់ ដោយសារ​សកម្មភាពរុករក​រ៉ែខុសច្បាប់។ ហើយ​កាលពីខែតុលា ឆ្នាំ​២០១៩​ កន្លងទៅ ហេតុការណ៍បាក់អណ្តូងរ៉ែដូចគ្នានេះ បានសម្លាប់មនុស្សអស់ ១៦នាក់៕