ពស់​ស្រកា​ចាស់​ខាំដៃ​រង​របួស​ឱ្យ​​គ្រូ​ខ្មែរ​​ព្យា​​បាល​​ជិត​កន្លះ​ខែ​អត់​ជា​ ទើប​​បញ្ជូន​ទៅ​​មន្ទីរ​ពេទ្យ

ខេត្តប៉ៃលិន ៖ ស្ត្រីចំណាស់ម្នាក់ឃើញពស់ស្រកា ចាស់មួយក្បាលដ៏ធំទម្ងន់ ជិតមួយគីឡូក្រាម ប្រវែងជាងមួយម៉ែត្រលូននៅ ក្បែរក្មេងៗរត់លេងនៅក្រោយផ្ទះរបស់ខ្លួន ដោយនឹកស្មានថា ជាពស់ថ្លាន់ក៏រត់ទៅចាប់ បណ្តាលឱ្យពស់ខាំចំម្រាមមេដៃខាងឆ្វេង ហើមជាំខ្មៅឈឺចុកចាប់មុខ របួសរហូតដល់សរសៃឆ្អឹងខ្នង ហើយស្ត្រីរូបនោះបានមួលក្បាល ពស់រហូតដាច់ រួចយកឱ្យអ្នកជិតខាងធ្វើម្ហូប ។ ចំណែកស្ត្រីរងគ្រោះក្រោយពីអ្នកជិតខាងប្រាប់ថា ជាពស់ស្រកាចាស់មានពិសច្រើន ទើបព្រលឹងចុងសក់ រួចឱ្យគេដឹកតាមម៉ូតូយកទៅ ព្យាបាលនៅផ្ទះគ្រូខ្មែរក្នុងភូមិ លុះព្យាបាលនៅទីនោះអស់រយៈពេលជិតកន្លះខែ ជនរងគ្រោះនៅតែមិនធូរស្បើយក៏បញ្ជូន ទៅព្យាបាលនៅមន្ទីរពេទ្យបង្អែក ខេត្តកាលពីព្រឹកថ្ងៃទី១ ឧសភា ២០១៣ ។

ស្ត្រីចំណាស់រងគ្រោះដែលត្រូវពស់ស្រកា ចាស់ខាំឈ្មោះសោម វល័ក្ខ អាយុ៥២ឆ្នាំ ជាអ្នកចម្ការ រស់នៅភូមិដីសថ្មី ឃុំស្ទឹងត្រង់ ស្រុកសាលាក្រៅ៕

បញ្ចូលអត្ថបទ ៖ បុប្ផា កោះ

ផ្តល់សិទ្ធដោយ កោះសន្តិភាព