ចុមៗ! Arsenal ចូលប្រជែងតាមប្រមាញ់តារាជួរមុខរបស់ Juventus ម្នាក់នេះដែរហើយ

បរទេស៖ បើតាមរបាយការណ៍បានឲ្យដឹងថា ក្លិបកាំភ្លើងធំ Arsenal កំពុងដាក់សំណើដោះដូរខ្សែប្រយុទ្ធ Alexandre Lacazette ឲ្យទៅសេះបង្កង់ Juventus ជាថ្នូរនឹងកីឡាករខ្សែបម្រើស្លាប Douglas Costa ។

ជាក់ស្តែង Arsenal កំពុងតែរង់ចាំសំណើសមរម្យមួយពីក្លិបធំៗមួយចំនួន ដើម្បីលក់ Lacazette ចេញនៅរដូវក្ដៅនេះ ខណៈដែល Juventus ជាបេក្ខភាពដែលកំពុងចាប់អារម្មណ៍ខ្លាំងចង់បានខ្សែប្រយុទ្ធរូបនេះទៅលេងនៅលីគ Serie A ដែរនោះ ។ ហើយដោយសារតែមូលហេតុនេះ ទើបធ្វើឲ្យ Arsenal សម្រេចចិត្តដាក់សំណើដោះដូររូបគេ ជាថ្នូរនឹងកីឡាករ Douglas Costa របស់ Juventus តែម្តងទៅ។

គួរឲ្យដឹងដែរថា បើទោះបីជាប៉ុន្មានឆ្នាំចុងក្រោយនេះ Costa មិនសូវជាមានភាពលេចធ្លោខ្លាំងនៅក្នុងក្លិប Juventus ក៏ពិតមែន ប៉ុន្តែការដែលផ្លាស់មក Arsenal គឺជាឱកាសមួយដ៏ល្អសម្រាប់រូបគេក្នុងការក្លាយខ្លួនជាតួសំខាន់ម្នាក់ឲ្យក្លិបនៅ Premier League មួយនេះ ពោលនឹងអាចមានលទ្ធភាពចូលលេងបានច្រើនជាងនៅ Juventus៕ 

ប្រភព៖ caughtoffside