ក្រុមបុរាណវិទូ​អេហ្ស៊ីប រកឃើញមឈូសបុរាណចំនួន១៣ មានអាយុកាលជាង២ពាន់ឆ្នាំ

គែរ៖ ក្រុមអ្នកស្រាវជ្រាវបុរាណវិទ្យា បានធ្វើកំណាយរកឃើញមឈូសបុរាណចំនួន១៣ ដែលមានអាយុកាលប្រមាណ ២,៥០០ឆ្នាំ ស្ថិតនៅក្នុងទីតាំងប្រវត្តិសាស្ត្រ Saqqara របស់ប្រទេសអេហ្ស៊ីប។ យោងតាមគេហទំព័រហ្វេសប៊ុកក្រសួងទេសចរណ៍ និងបុរាណវិទ្យារបស់ប្រទេសអេហ្ស៊ីបបាន​ឱ្យដឹងថា មឈូស​ទាំងនេះត្រូវបានរកឃើញនៅក្នុងរណ្តៅបញ្ចុះសពមួយ ដែលមានជម្រៅជាង ១០ម៉ែត្រ។  

ប្រភពដដែលបានឱ្យដឹងទៀតថា មឈូសបុរាណដែលបានរកឃើញនេះ គឺមិនធ្លាប់មនុស្សគាស់កកាយពីមុនមកទេ ហើយអាជ្ញាធរក៏នៅមិនទាន់អាចបញ្ជាក់ពីចំនួនមឈូសសរុបដែរ។ ប៉ុន្តែរាល់សំណួរទាំង​អស់នឹងត្រូវបានឆ្លើយទៅវិញក្នុងរយៈពេលពីរបីថ្ងៃខាងមុខ​ទៀត ខណៈពេលដែលក្រុមអ្នកជំនាញ​នៅតែបន្តការធ្វើកំណាយ​​បន្ថែម។

គួរជម្រាបដែរថា បច្ចុប្បន្នប្រទេសអេហ្ស៊ីប បាននឹងកំពុងបន្តលាតត្រដាង​ ក៏ដូចជាបង្ហាញឱ្យពិភពលោកបានឃើញ នូវប្រវត្តិសាស្ត្រដ៏សម្បូរបែបរបស់ខ្លួន តាមរយៈការធ្វើកំណាយរកឃើញវត្ថុបុរាណថ្មីៗជាបន្តបន្ទាប់ដូចជា រូបសំណាករបស់ព្រះអេហ្ស៊ីបបុរាណ និង​ព្រះចៅ Pharaoh Ramses II ជាដើម៕