បារាំង៖ ក្រុមមាន់គកបារាំង នៅតែបន្តធ្វើឲ្យក្រុមក្រូអាតឈឺចាប់ ដោយកាលពីយប់មិញ ពួកគេបានលត់ក្រុមជើងឯករងព្រឹត្តិការណ៍ FIFA World Cup ឆ្នាំ២០១៨ មួយនេះ យ៉ាងចាស់ដៃដោយលទ្ធផល ៤ទល់នឹង២ ក្នុងការប្រកួតពានរង្វាន់ Nation League ពូល 3A ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សការប្រកួតដែលប្រព្រឹត្តិទៅនៅកីឡដ្ឋាន Stade de France កាលពីម្សិលមិញនេះ ក្រុមភ្ញៀវក្រូអាតជាអ្នកបើកឆាកនាំមុខមុន សម្រេចទីដោយអតីតខ្សែការពារក្រុម Liverpool កីឡាករ Dejan Lovren នៅនាទីទី១៧។
ការប្រកួតអូសបន្លាយដល់នាទីទី៤៣ ម្ចាស់អាវលេខ៧ Antoine Griezmann បានស៊ុតតាមស្មើឲ្យបារាំង ក្រោយទទួលបានបាល់ពីការបញ្ជូនរបស់ខ្សែប្រយុទ្ធ Anthony Martia ខណៈមុននឹងបញ្ចប់តង់ទី១ នៅនាទីទី៤៥+១ Martial ឆ្លៀតបន្ថែម១គ្រាប់ទៀត ឲ្យក្រុមម្ចាស់ផ្ទះនាំមុខ ២-១ វិញម្ដង។
លុះផ្លុំកញ្ចែចូលតង់ទី២ បានប្រមាណ១០នាទី ខ្សែប្រយុទ្ធ Josip Brekalo បានប្រើបច្ចេកទេស ញាក់ខ្សែការពារក្រុមបារាំង២-៣រូប ស៊ុតបញ្ចូលទីយ៉ាងអស្ចារ្យជួយក្រូអាតតាមស្មើ២ទល់នឹង២។
យ៉ាងណាមិញ បារាំងមិនបានបណ្ដោយឲ្យលទ្ធផលនេះរក្សាដល់បញ្ចប់ការប្រកួតនោះទេ ពោលខ្សែការពារ Dayot Upamecano និង ជើងស៊ុតចាស់វស្សា Olivier Giroud បានបន្ថែមម្នាក់១គ្រាប់ទៀត នៅនាទីទី៦៥ និង ៧៧ ជួយបារាំងយក៣ពិន្ទុពីការប្រកួតនេះតែម្ដង។
តាមរយៈលទ្ធផលនេះ បានជួយបារាំងឡើងមកឈរលេខ២ ក្នុងពូល មាន៦ពិន្ទុ ស្មើគ្នាជាមួយក្រុមកំពូលតារាង ព័រទុយកាល់ ដែលបានយកឈ្នះក្រុមស៊ុយអែត ២-០ កាលពីយប់មិញនោះ។
គួរឲ្យដឹងដែរថា ១គ្រាប់រកបានកាលពីយប់មិញ ទល់នឹងក្រូអាត ជាគ្រាប់ទី៤០ហើយ របស់ខ្សែប្រយុទ្ធវ័យ៣៣ឆ្នាំ Giroud ក្នុងចំណោមការបង្ហាញខ្លួន៩៩ប្រកួត តាំងពីឆ្នាំ២០១១មកឲ្យជម្រើសជាតិបារាំង៕
សូមទស្សនាវីដេអូ សង្ខេបនៃការប្រកួតខាងក្រោមនេះ៖