ទិដ្ឋភាពក្រោយព្យុះ Haishen ដែលបានបោកបក់ទៅលើប្រទេសជប៉ុន (មានវីដេអូ)

តូក្យូ៖ ប្រព័ន្ធផ្សព្វផ្សាយរបស់ជប៉ុន NHK បានរាយការណ៍ថា ព្យុះ Haishen បានធ្វើដំណើរឆ្លងកាត់តំបន់ភាគខាងត្បូង និងភាគនិរតីនៃប្រទេសជប៉ុនរួចទៅហើយ។ ប៉ុន្តែអាជ្ញាធរ​ជប៉ុន​ នៅតែអំពាវនាវឱ្យប្រជាជនត្រូវបន្តការប្រុងប្រយ័ត្នខ្ពស់។

ព្យុះទីហ្វុង Haishen ដ៏មានឥទ្ធិពលមួយនេះ បានវាយប្រហារមកលើតំបន់កោះ Kyushu ​និង Chugoku ដោយនាំមក​ជាមួយខ្យល់​កន្ត្រាក់ និងមានភ្លៀងធ្លាក់​ខ្លាំង ដែលបណ្តាលឱ្យមនុស្សយ៉ាងហោចណាស់ ៤៦នាក់ត្រូវរងរបួស និង ៤នាក់​ផ្សេងទៀតកំពុងបាត់ខ្លួន។

គួរជម្រាបដែរថា ព្យុះទីហ្វុង Haishen នេះបានបំផ្លាញកសិដ្ឋាន ដំណាំ ផ្ទះកញ្ចក់ និងបណ្តាលឱ្យផ្ទះសម្បែងប្រមាណ ៣០ម៉ឺនខ្នងគ្មានអគ្គិសនីប្រើប្រាស់។ បន្ថែមពីនេះ មានប្រជាជន​ជាង ៨សែននាក់​ត្រូវគេជម្លៀសទៅទីកន្លែងសុវត្ថិភាព ហើយជើងហោះហើរ ក៏ដូចជាជើងរថភ្លើងល្បឿនលឿន ត្រូវបានផ្អាកដំណើរការផងដែរ៕

សូមទស្សនាវីដេអូខាងក្រោម៖