រុស្ស៊ី៖ អ្នកវិទ្យាសាស្ត្ររុស្ស៊ីបានចេញផ្សាយរបាយការណ៍ដំបូង ស្ដីពីវ៉ាក់សាំងការពារវីរុសកូរ៉ូណារបស់ពួកគេ ដោយនិយាយថាការធ្វើតេស្ដដំបូងបង្ហាញសញ្ញានៃការឆ្លើយតបប្រព័ន្ធភាពស៊ាំ។ របាយការណ៍ដែលចុះផ្សាយក្នុងទិនានុប្បវត្តិវេជ្ជសាស្ត្រ The Lancet បាននិយាយថា អ្នកស្ម័គ្រចិត្តទាំងអស់បានបង្កើតអង្គបដិប្រាណ ដើម្បីប្រឆាំងនឹងវីរុស ហើយមិនមានផលប៉ះពាល់ធ្ងន់ធ្ងរនោះទេ។

ប្រទេសរុស្ស៊ីបានផ្ដល់អាជ្ញាប័ណ្ណវ៉ាក់សាំង សម្រាប់ការប្រើប្រាស់ក្នុងស្រុកនៅក្នុងខែសីហា ដែលជាប្រទេសដំបូងគេអាចសម្រេចបានដូច្នេះ មុនពេលទិន្នន័យត្រូវបានចេញផ្សាយ។ អ្នកជំនាញនិយាយថា ការសាកល្បងនេះគឺមានលក្ខណៈទ្រង់ទ្រាយតូចពេក សម្រាប់ការបញ្ជាក់ពីផ្នែកសុវត្ថិភាពនិងប្រសិទ្ធភាព។ ប៉ុន្តែទីក្រុងមូស្គូបានសាទរចំពោះលទ្ធផលនេះ ដើម្បីឆ្លើយតបទៅកាន់អ្នករិះគន់។

វ៉ាក់សាំងការពារវីរុសកូរ៉ូណារបស់រុស្ស៊ី

អ្នកជំនាញលោកខាងលិចមួយចំនួនបានលើកឡើងពីការព្រួយបារម្ភ អំពីល្បឿននៃការងាររបស់ប្រទេសរុស្ស៊ី ដោយសង្ស័យថាក្រុមអ្នកស្រាវជ្រាវទាំងនោះអាចដើរផ្លូវកាត់។ កាលពីខែមុន ប្រធានាធិបតី វ៉្លាឌីមៀ ពូទីន បាននិយាយថា វ៉ាក់សាំងនេះត្រូវបានឆ្លងកាត់ការត្រួតពិនិត្យចាំបាច់ទាំងអស់ ហើយកូនស្រីរបស់គាត់ម្នាក់ក៏ទទួលបានវ៉ាក់សាំងនេះរួចមកហើយដែរ។

ការសាកល្បងចំនួនពីរនៃវ៉ាក់សាំងដែលមានឈ្មោះថា Sputnik-V ត្រូវបានធ្វើឡើងនៅចន្លោះខែមិថុនា និងខែកក្កដា។ អ្នកស្ម័គ្រចិត្តចំនួន៣៨នាក់ដែលមានសុខភាពល្អបានចាក់វ៉ាក់សាំងមួយដូស ហើយបន្ទាប់មកទទួលបានវ៉ាក់សាំងម្ដងទៀត ក្នុងរយៈពេលបីសប្ដាហ៍ក្រោយមក។

អ្នកដែលបានចូលរួមមានអាយុចន្លោះពី១៨ទៅ៦០ឆ្នាំ ត្រូវបានតាមដានអស់រយៈពេល៤២ថ្ងៃ ហើយពួកគេទាំងអស់បានបង្កើតអង្គបដិប្រាណ ក្នុងរយៈពេលបីសប្ដាហ៍។ ក្នុងចំណោមផលប៉ះពាល់ទូទៅបំផុតគឺការឈឺក្បាល និងឈឺសន្លាក់៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]