ភ្នំពេញ៖ ដី ១៥ហិកតា ដែលស្ថិតនៅបឹងតាមោក រដ្ឋាបាលបានចេញអនុក្រឹត្យកាត់ឱ្យ ក្រសួងអភិវឌ្ឍន៍ជនបទ សម្រាប់សាងសង់ទីស្ដីការថ្មី នៅតាមបណ្តោយមហាវិថីឈ្នះ ឈ្នះ ក្នុងខណ្ឌព្រែកព្នៅរាជធានីភ្នំពេញ ដើម្បីបង្កភាពងាយស្រួលដល់ការបម្រើការងារ និងបើកកិច្ចប្រជុំនានា។
នៅក្នុងអនុក្រឹត្យ បានបញ្ជាក់ថា «ដោយមើលឃើញពីស្ថានភាពជាក់ស្ដែងរបស់ក្រសួងអភិវឌ្ឍន៍ជនបទ បច្ចុប្បន្ន ទីតាំងតូចចង្អៀត ដែលស្ថិតនៅជាប់ទីស្តីការគណៈរដ្ឋមន្ត្រី មានផ្លូវតូចចង្អៀតខ្វះទីចំណតយានយន្ត និងបង្កការកកស្ទះរាល់ថ្ងៃ។ ដូច្នេះ រដ្ឋាភិបាលបានសម្រេចផ្តល់ផ្ទៃដីបឹងតាមោកទំហំ ១៥ហិកតា សម្រាប់សាងសង់អគារទីស្តីការថ្មី»។
អនុក្រឹត្យបានបន្តថា កាលពីថ្ងៃទី១ ខែកញ្ញា ឆ្នាំ២០២០ ទីស្តីការគណៈរដ្ឋមន្ត្រី បានចេញលិខិតសេចក្ដីជូនដំណឹង ទៅក្រសួងសេដ្ឋកិច្ច ក្រសួងរៀបចំដែន ក្រសួងធនធានទឹក និងអភិបាលរាជធានីភ្នំពេញ តាមរយៈលិខិត៧៩០ សជណ.មយ ស្តីពីកម្មវត្ថុសំណើសុំ គោលការណ៍អនុញ្ញាតកាត់ផ្ទៃបឹងតាមោក (បឹងកប់ស្រូវ) ទំហំ ១៥ហិកតា ស្ថិតនៅខណ្ឌព្រែកព្នៅ រាជធានីភ្នំពេញ សម្រាប់សាងសង់អគារទីស្តីការក្រសួងអភិវឌ្ឍន៍។
សូមរម្លឹកថា អនុក្រឹត្យចុះថ្ងៃទី៣ ខែកុម្ភៈ ឆ្នាំ២០១៦ បង្ហាញថា ផ្ទៃបឹងតាមោក មានទំហំ ៣.២៣៩ហិកតារ ប៉ុន្តែត្រូវបានរដ្ឋាភិបាល សម្រេច ឱ្យលុបយ៉ាងហោចណាស់ ៤ដងហើយ។
លើកទី១ រដ្ឋាភិបាលសម្រេចឱ្យលុបបឹងទំហំ ៤៥ហិកតារ កាលពីខែតុលា ឆ្នាំ២០១៨ ដើម្បីយកដីទៅឱ្យឯកជន ដោយអះអាងថា ជាម្ចាស់ដើមនៃដី។ លើកទី២ នៅឆ្នាំ២០១៨ ដដែល រដ្ឋាភិបាលសម្រេចឱ្យលុបផ្ទៃបឹងចំនួន ២០ហិកតារទៀតទៅឱ្យសាលារាជធានីភ្នំពេញ ដើម្បីអភិវឌ្ឍន៍ជាផ្សារ និងចំណតរថយន្ត ដែលគ្រោងរើចេញផ្នែកខ្លះ ពីផ្សារដើមគរ នៅខណ្ឌទួលគោក។ ការសម្រេចលុបបឹងលើកទី៣ និងលើកទី៤ គឺការសម្រេចលុប ៨៣ហិកតារ គណៈរដ្ឋមន្ត្រីអះអាងថា ដើម្បីបង្កើតជាសួនច្បារ ឧទ្យានធម្មជាតិ និងអគារអគ្គស្នងការនគរបាលជាតិ។
គូសបញ្ជាក់ថា បឹងនេះ ស្ថិតនៅផ្នែកខាងលិចឆៀងខាងជើងរាជធានីភ្នំពេញ ស្ថិតនៅចន្លោះខណ្ឌព្រែកព្នៅ និងខណ្ឌសែនសុខ មានភូមិចំនួន ១៩៕
ដោយ៖ Moeun Dyna
Bong I.T