ដោយសារតែព្យុះ នាវាដឹកទំនិញមួយបានក្រឡាប់ ហើយនាវិកនិងសត្វពាហនៈរាប់ពាន់ក្បាលនៅលើនោះ កំពុងបាត់ខ្លួន

ជប៉ុន៖ ឆ្មាំសមុទ្រជប៉ុនបានជួយសង្គ្រោះមនុស្សម្នាក់ពីនាវាដឹកទំនិញ ដែលគិតថាបានលិចនៅពេលមានព្យុះទីហ្វុង ដោយនៅលើនោះមាននាវិកជាង៤០នាក់និងសត្វពាហនៈចំនួន៦,០០០ក្បាលផងដែរ។ សមាជិកនាវិករូបនេះដែលត្រូវបានគេរកឃើញ បានរសាត់អណ្ដែតជាមួយអាវពោងសុវត្ថិភាព ហើយគាត់បានបញ្ជាក់ថា នាវាបានក្រឡាប់។

នាវា Gulf Livestock 1 បានបញ្ជូនសញ្ញាប្រកាសអាសន្នពីតំបន់សមុទ្រចិនខាងកើត បន្ទាប់ពីជួបប្រទះព្យុះទីហ្វុងមៃសាក់។ ការស្វែងរកនាវិកផ្សេងទៀតនិងនាវានៅតែបន្ត ប៉ុន្តែរហូតមកដល់ពេលនេះ មិនបានរកឃើញអ្នកនៅរស់រានមានជីវិតទៀតទេ។ ក្រុមនាវិកនៃនាវាដឹកទំនិញរួមមានអ្នកដើរសមុទ្រចំនួន៣៩នាក់មកពីប្រទេសហ្វីលីពីន មកពីប្រទេសនូវែលសេឡង់២នាក់ និង២នាក់ទៀតមកពីប្រទេសអូស្ត្រាលី។

បើយោងតាមឆ្មាំសមុទ្រជប៉ុន បុរសដែលត្រូវបានគេជួយសង្គ្រោះគឺជានាវិកជនជាតិហ្វីលីពីនម្នាក់ ដែលបាននិយាយថា ម៉ាស៊ីនរបស់នាវាបានខូច មុនពេលក្រឡាប់ បន្ទាប់ពីត្រូវរលកបក់បោក។ ក្រសួងការបរទេសនូវែលសេឡង់បាននិយាយថា នាវា Gulf Livestock 1 បានចាកចេញពីប្រទេសនូវែលសេឡង់នៅថ្ងៃទី១៤ ខែសីហា ឆ្ពោះទៅប្រទេសចិន ដោយការធ្វើដំណើរត្រូវបានរំពឹងទុកថា នឹងចំណាយពេល១៧ថ្ងៃ។

នៅយប់ថ្ងៃពុធ នាវាបានបញ្ជូនសញ្ញាប្រកាសអាសន្នពីសមុទ្រ ទៅកាន់ភាគខាងលិចកោះ Amami Oshima ប្រទេសជប៉ុន។ សេចក្ដីរាយការណ៍បាននិយាយថា ឆ្មាំសមុទ្រជប៉ុនកំពុងចាប់ផ្ដើមបេសកកម្មស្វែងរក និងជួយសង្គ្រោះជាលើកទី២ មុនពេលព្យុះទីហ្វុងចូលមកដល់៕