ប៉េកាំង៖ ក្រសួងពាណិជ្ជកម្មចិនបាននិយាយនៅថ្ងៃព្រហស្បតិ៍នេះថា ប្រទេសចិនប្រកាសប្រឆាំងដាច់ខាត ចំពោះសកម្មភាពរដ្ឋាភិបាលឥណ្ឌា ដែលបានហាមឃាត់លែងឲ្យកម្មវិធីចិនរាប់រយកម្មវិធី បើកដំណើរការលើទឹកដីរបស់ខ្លួនជាបន្តបន្ទាប់។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័ស
អ្នកនាំពាក្យក្រសួងពាណិជ្ជកម្មចិនលោក Gao Feng បានប្រាប់សន្និសីទកាសែតយ៉ាងដូច្នេះថា៖
សកម្មភាពរបស់ឥណ្ឌាគឺជាការរំលោភលើផលប្រយោជន៍ស្របច្បាប់របស់វិនិយោគិន និងអ្នកផ្តល់សេវាកម្មចិន។ ហើយប្រទេសចិនសូមស្នើឲ្យឥណ្ឌាកែកំហុសរបស់ខ្លួន តាមរយៈការអនុញ្ញាតបើកដំណើរការ កម្មវិធីទូរសព្ទចិន ក៏ដូចជាទាំងហ្គេមទាំងអស់ឡើងវិញ។
គួរជម្រាបដែរថា រដ្ឋាភិបាលឥណ្ឌាបានសម្រេចប្រកាសបិទកម្មវិធីចិនចំនួន ១១៨បន្ថែមទៀតកាលពីថ្ងៃពុធនេះ ដោយលើកឡើងថា វាបានធ្វើឱ្យប៉ះពាល់ដល់អធិបតេយ្យភាព បូរណភាពទឹកដីប្រទេសឥណ្ឌា។ ហើយជាពិសេសវាក៏ធ្វើឱ្យប៉ះពាល់ដល់ ប្រព័ន្ធការពារជាតិ សន្តិសុខនិងសណ្តាប់ធ្នាប់សាធារណៈក្នុងប្រទេសឥណ្ឌា ខណៈពេលដែលបញ្ហាជម្លោះព្រំដែនរវាងឥណ្ឌានិងចិន កំពុងតែឡើងកម្តៅ៕
Bong I.T