ប្រហោងខ្មៅចំនួនពីរបានបុកគ្នា តាំងពី៧ប៊ីលានឆ្នាំមុន ហើយរលកទំនាញរបស់វាទើបមកប៉ះផែនដី នៅពេលនេះ

អាមេរិក៖ ក្រុមតារាវិទូបានរកឃើញការត្របាញ់បញ្ចូលគ្នាដ៏ខ្លាំងបំផុតនៃប្រហោងខ្មៅចំនួនពីរ ដែលមានវ័យចំណាស់ ហើយរលកទំនាញរបស់វាទើបតែមកប៉ះផែនដី។ ការបុកគ្នានេះបង្កើតជាប្រហោងខ្មៅមាឌមធ្យម ដែលត្រូវបានគេរកឃើញជាលើកដំបូង ហើយវាមានម៉ាស១៤២ដងនៃព្រះអាទិត្យរបស់យើង។

ថាមពលនៃសូររបស់វាបង្កើតឡើងដោយការរួមបញ្ចូលប្រហោងខ្មៅទាំងពីរ ដែលបានបញ្ចេញរលកទំនាញ ឬក៏បានធ្វើឲ្យលំហអវកាសមានរាងរលក ដែលមានថាមពលស្មើនឹងព្រះអាទិត្យ៨។ រលកទាំងនោះបានចំណាយពេល៧ប៊ីលានឆ្នាំ ដើម្បីធ្វើដំណើរឆ្លងកាត់ទីអវកាស ដើម្បីមកដល់ផែនដីរបស់យើង។

ប្រហោងខ្មៅដែលទើបនឹងរកឃើញថ្មីនេះ គឺជាអ្វីដែលត្រូវបានគេហៅថាប្រហោងខ្មៅមាឌមធ្យម ពីព្រោះម៉ាសរបស់វាស្ថិតនៅចន្លោះពី១០០ទៅ១,០០០ដងនៃព្រះអាទិត្យ។ វាមានទំហំធំជាងម៉ាសនៃផ្កាយនានា និងតូចជាងម៉ាសរបស់ប្រហោងខ្មៅយក្ស។ ក្រុមតារាវិទូចាប់បានសញ្ញានៃរលកទំនាញទំនងជាបានកើតឡើង នៅពេលប្រហោងខ្មៅពីរបានត្របាញ់បញ្ចូលគ្នា។

រលកទំនាញត្រូវបានគេតាមដាននៅលើផែនដី កាលពីថ្ងៃទី២១ ខែឧសភា ឆ្នាំ២០១៩ ដោយឧបករណ៍ចំនួនពីរ នៅមន្ទីរអង្កេតតារាសាស្ត្រ National Science Foundation's Laser Interferometer Gravitational-wave Observatory ក្នុងសហរដ្ឋអាមេរិក ក៏ដូចជាការចាប់រលកសញ្ញាក្នុងប្រទេសអ៊ីតាលីផងដែរ។

ការសិក្សាចំនួនពីរនេះទើបតែត្រូវបានចុះផ្សាយ កាលពីថ្ងៃពុធ អំពីព្រឹត្តិការណ៍រលកទំនាញ នៅលើទិនានុប្បវត្តិ Physical Review Letters និងមួយទៀតនិយាយលម្អិតអំពីផលប៉ះពាល់នៃព្រឹត្តិការណ៍នេះ ដែលបានចុះផ្សាយលើទិនានុប្បវត្តិ Astrophysical Journal Letters៕