កាលពីខែកក្កដាកន្លងទៅនេះ រដ្ឋាភិបាលនៃប្រទេសឥណ្ឌា បានប្រកាសធ្វើការត្រួតពិនិត្យដើម្បីហាមឃាត់កម្មវិធីដែលមានដើមកំណើតចិនចំនួន ២៧៥ ជាលទ្ធផលឥណ្ឌាបានសម្រេចបិទកម្មវិធីចំនួន ១១៨ កាលពីម្សិលមិញនេះ ហើយក្នុងចំណោមកម្មវិធីដែលត្រូវបានបិទទាំងនោះ មាន៣កម្មវិធី ដែលជារបស់ក្រុមហ៊ុន Alibaba គឺ Alipay Taobao និង Youku ព្រមទាំងកម្មវិធីថតរូបភាព Ulike និងហ្គេម PUBG Mobile ដែលមានអ្នកប្រើប្រាស់ដល់ទៅជាង ៤០លាននាក់ នៅក្នុងប្រទេសឥណ្ឌា។

រូបភាពពីនាយកដ្ឋានប្រឆាំងបទល្មើសបច្ចេកវិទ្យា

គួររំឭកផងដែរថា កាលពីខែមិថុនា ក្រសួងបច្ចេកវិទ្យាព័ត៌មានរបស់ប្រទេសឥណ្ឌាបានធ្វើការហាមឃាត់កម្មវិធីទូរសព្ទរបស់ប្រទេសចិន ចំនួន ៥៩ កម្មវិធីរួចមកហើយ ដែលមានដូចជា TikTok WeChat និង UC Browser ជាដើម។ ដូច្នេះរហូតមកដល់ពេលនេះប្រទេសឥណ្ឌាបានបិទកម្មវិធី ដែលមានប្រភពពីប្រទេសនេះចំនួន ១៧៧ រួចហើយ។

រដ្ឋាភិបាលប្រទេសឥណ្ឌាបានថ្លែងថាទៀតថា ពួកគេបានទទួលនូវសេចក្ដីរាយការណ៍នូវភាពមិនប្រក្រតីទាក់ទងនឹងកម្មវិធីទាំងនេះ ថាបានលួចយកទិន្នន័យឯកជនភាពរបស់អ្នកប្រើប្រាស់។ ក្រសួងព័ត៌មានវិទ្យារបស់ប្រទេសឥណ្ឌាក៏បានបន្ថែមថា ការលួចយកទិន្នន័យទាំងនេះគឺវាមានការប៉ះពាល់ទៅលើសន្តិសុខជាតិ និងអធិបតេយ្យភាពរបស់ប្រទេសឥណ្ឌា។ ម្យ៉ាងវិញទៀតប្រទេសនេះកំពុងតែតាក់តែង បទបញ្ជាដែលទាមទារឱ្យក្រុមហ៊ុនមានការអនុញ្ញាតពីអ្នកប្រើប្រាស់មុនដែលពួកគេអាចប្រើទិន្នន័យឯកជនភាពទាំងនោះបាន។

រូបភាពពីនាយកដ្ឋានប្រឆាំងបទល្មើសបច្ចេកវិទ្យា

សូមបញ្ជាក់បន្ថែមទៀតថា កម្មវិធីដែលរដ្ឋាភិបាលប្រទេសឥណ្ឌាបានធ្វើការហាមឃាត់ សុទ្ធសឹងតែជាកម្មវិធីដែលមានប្រជាប្រិយភាពខ្លាំងដូចជា កម្មវិធី TikTok ដែលមានអ្នកប្រើប្រាស់ប្រមាណជាង ២០០លាននាក់ និងហ្គេម PUBG Mobile ក៏មានចំនួនអ្នកលេងច្រើនជាង ៤០លាននាក់នៅក្នុងប្រទេសនេះ៕

ប្រភពព័ត៌មាន៖ នាយកដ្ឋានប្រឆាំងបទល្មើសបច្ចេកវិទ្យា - Anti Cyber Crime Department

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]