ឥណ្ឌា​ប្រកាសបិទកម្មវិធីចិនជាង១​០០បន្ថែមទៀត ខណៈពេលបញ្ហាជម្លោះព្រំដែនកាន់តែ​ឡើងកម្តៅ

ញូដេលី៖ រដ្ឋាភិបាលឥណ្ឌាបានសម្រេចប្រកាសបិទកម្មវិធីចិនចំនួន ១១៨បន្ថែមទៀត ​ស្របពេលបញ្ហាជម្លោះព្រំដែនរវាងប្រទេសទាំងពីរកាន់តែ​ឡើងកម្តៅ ក្នុងរយៈពេលប៉ុន្មានសប្តាហ៍ចុងក្រោយនេះ។

ក្រសួងបច្ចេកវិទ្យាព័ត៌មានឥណ្ឌា​បាននិយាយកាលពីថ្ងៃពុធថា​ កម្មវិធីទូរសព្ទជាច្រើន ដែលរួមបញ្ជូលទាំងហ្គេមដ៏ពេញនិយម PUBG និងសេវាកម្មផ្សេងៗទៀត ដែលផ្តល់ដោយក្រុមហ៊ុនអ៊ីនធឺណេតយក្សចិន Tencent  បានធ្វើឱ្យប៉ះពាល់ដល់អធិបតេយ្យភាព បូរណភាពទឹកដីប្រទេសឥណ្ឌា។ ហើយជាពិសេសវាក៏ធ្វើឱ្យប៉ះពាល់ដល់ ប្រព័ន្ធការពារ​ជាតិ​ សន្តិសុខ​និងសណ្តាប់ធ្នាប់សាធារណៈក្នុងប្រទេសឥណ្ឌាផងដែរ។

​ក្នុងរយៈពេល​ប៉ុន្មានសប្តាហ៍ចុងក្រោយនេះ មានការប៉ះទង្គិចគ្នាជាច្រើនលើកច្រើនសារវាងកងទ័ពឥណ្ឌានិងចិន នៅតាមតំបន់ជម្លោះព្រំដែនជួរភ្នំហិម៉ាឡៃ។ ហើយកាលពីខែមិថុនាកន្លងទៅ​ មានទាហានឥណ្ឌាយ៉ាងហោចណាស់ ២០នាក់ ត្រូវបានសម្លាប់នៅក្នុងការប្រយុទ្ធគ្នាលើបញ្ហាព្រំដែននេះ។ ចំណែកខាងភាគីចិនឯណោះវិញ ក៏​មានអ្នកស្លាប់ និងរង​របួសដូចគ្នាដែរ ប៉ុន្តែអាជ្ញាធរចិនមិន​បង្ហាញតួលេខ​។

គួររម្លឹកផងដែរថា កាលពីពេលថ្មីនេះ រដ្ឋាភិបាលឥណ្ឌាក៏បានប្រកាសបិទកម្មវិធី TikTok រួមជាមួយកម្មវិធីចិនចំនួន ៥៨ ផ្សេងទៀតជារៀងរហូតដែរ បន្ទាប់ពី​មានការប៉ះទង្គិចគ្នារវាងកងទ័ពឥណ្ឌានិងចិនកាលពីខែមិថុនា ជុំវិញបញ្ហាជម្លោះព្រំដែន​៕