គ្រោះរញ្ជួយដីកម្រិត​ ៦.៨រ៉ិចទ័រ បានវាយប្រហារទៅលើប្រទេស​ឈីលី

សង់ចាកូ៖ ប្រព័ន្ធផ្សព្វផ្សាយក្នុងស្រុករបស់ប្រទេសឈីលីបានរាយការណ៍ថា គ្រោះរញ្ជួយដីកម្រិត ៦.៨រ៉ិចទ័រ បានវាយប្រហារនៅក្បែរឆ្នេរភាគខាងជើងប្រទេសឈីលី​ថ្ងៃអង្គារនេះ ដែល​បណ្តាលឱ្យមានការបាក់ស្រុតដី និងបង្កជាការខូចខាត​មួយចំនួន ប៉ុន្តែមិនមានការព្រមានអំពីរលកយក្សស៊ូណាមិនោះទេ។

គ្រោះរញ្ជួយដីនេះបានកើតឡើងនៅវេលាម៉ោង ១២:០៩នាទីអធ្រាត​ (ម៉ោងនៅឈីលី) ដែលស្ថិតនៅ​ភូមិមួយ ក្នុងទីក្រុង Vallenar ​ភាគខាងជើងតំបន់ Atacama ​។ ប្រជាជនមួយចំនួនដែលរស់នៅក្បែរតំបន់ឆ្នេរ ត្រូវបានជម្លៀសចេញដើម្បី​បង្ការគ្រោះថ្នាក់ ហើយរហូតមកដល់ពេលនេះ មិនទាន់មានរបាយការណ៍អំពីអ្នកស្លាប់និងរបួសនៅឡើយទេ។

គួរជម្រាប​ដែរថា ​ឈីលីគឺ​ជាប្រទេស​​មួយស្ថិតនៅ​តំបន់ខ្សែក្រវាត់ភ្លើង នៃមហាសមុទ្រប៉ាស៊ីហ្វិក​ (Pacific Ring of Fire)  ដែលជាទីតាំង​តែងកើតមាន គ្រោះរញ្ជួយដី ​បន្ទុះភ្នំភ្លើង និងរលកយក្សស៊ូណាមិជាញឹកញាប់។ ហើយកាលពីខែឧសភា ឆ្នាំ១៩៦០ គ្រោះរញ្ជួយដីកម្រិត ៩.៥រ៉ិចទ័រ បានវាយប្រហារទៅលើ​ប្រទេសនេះ ដែលបណ្តាលឱ្យមនុស្សរាប់ពាន់នាក់ត្រូវស្លាប់បាត់បង់ជីវិត៕