ហារ៉ា៖ អ្នកនាំពាក្យឧទ្យានបាននិយាយកាលពីថ្ងៃអាទិត្យថា អាជ្ញាធរឧទ្យានជាតិប្រចាំប្រទេសហ្ស៊ីមបាវ៉េ កំពុងបើកការស៊ើបអង្កេតលើការស្លាប់របស់សត្វដំរីចំនួន ១២ក្បាល នៅក្នុងតំបន់ព្រៃមួយ ដែលស្ថិតនៅភាគខាងលិចប្រទេសនេះ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោក Tinashe Farawo ដែលជាអ្នកនាំពាក្យនៃឧទ្យានជាតិ និងអាជ្ញាធរគ្រប់គ្រងសត្វព្រៃប្រទេសហ្ស៊ីមបាវ៉េបានថ្លែងថា សាកសពសត្វដំរីត្រូវបានគេរកឃើញកាលពីថ្ងៃសុក្រ នៅតំបន់ព្រៃ Pandamasue ដែលស្ថិតនៅចន្លោះឧទ្យានជាតិ Hwange និងតំបន់ទឹកធ្លាក់ Victoria Falls ហើយគំរូឈាមត្រូវបានយកទៅមន្ទីរពិសោធន៍ ដើម្បីធ្វើការវិភាគរកឱ្យឃើញពីមូលហេតុនៃការស្លាប់របស់ពួកវា។
ការស្លាប់ដោយអាថ៌កំបាំងនៃសត្វដំរីនៅប្រទេសហ្ស៊ីមបាវ៉េនេះ គឺស្រដៀងនឹងការស្លាប់របស់សត្វដំរីជាង ២៧៥ក្បាល នៅក្នុងតំបន់ដីសណ្ត Okavango ក្នុងប្រទេសបុតស្វាណា កាលពីខែមុនដែរ។ ហើយរហូតមកទល់ពេលនេះ ក្រុមអ្នកជំនាញបាននឹងកំពុងបន្តធ្វើការស៊ើបអង្កេតលើការស្លាប់របស់សត្វដំរីទាំងនោះនៅឡើយ។
គួរជម្រាបដែរថា បុតស្វាណា គឺជាប្រទេសសម្បូរសត្វដំរីជាងគេបំផុតនៅលើពិភពលោក ដោយមានចំនួនដំរីសរុប ១៥៦,០០០ក្បាល។ ចំណែកប្រទេសហ្ស៊ីមបាវ៉េ ដែលជាប្រទេសសម្បូរសត្វដំរីលំដាប់ទី២ មានចំនួនដំរីសរុប ៨៥,០០០ក្បាល ហើយកាលពីឆ្នាំមុន សត្វដំរីប្រហែល ២០០ក្បាល បានស្លាប់ដោយសារការអត់ឃ្លាន ក៏ព្រោះតែប្រទេសមួយនេះជួបគ្រោះរាំងស្ងួត៕