បរទេស៖ តាមការស្រាវជ្រាវថ្មីមួយដោយប្រើតេឡេទស្សន៍អវកាស Hubble Space Telescope បានឲ្យដឹងថា កាឡាក់ស៊ីអ៊ីនដ្រូមីដាដែលជាអ្នកជិតខាងធំបំផុតរបស់កាឡាក់ស៊ីមីលគីវ៉េ គឺមានវង់រស្មីជុំវិញ ហើយវាកំពុងតែមកកៀកវង់នៃកាឡាក់ស៊ីរបស់យើង។ វង់នេះគឺស្រោបដោយឧស្ម័នដែលព័ទ្ធជុំវិញកាឡាក់ស៊ីមួយ។

ក្រុមអ្នកវិទ្យាសាស្ត្របានប្រើតេឡេទស្សន៍ហាប់ប៊ូល ដើម្បីសិក្សានិងផែនទីវង់រស្មីនៃកាឡាក់ស៊ីអ៊ីនដ្រូមីដាយ៉ាងទូលំទូលាយ ហើយមានការភ្ញាក់ផ្អើលដែលបានរកឃើញរចនាសម្ព័ន្ធពិសេស ក៏ដូចជាទំហំដ៏ធំរបស់វា។ វង់នេះបានលាតសន្ធឹងចម្ងាយ១.៣លានឆ្នាំពន្លឺពីកាឡាក់ស៊ីរបស់វា ពោលជិតពាក់កណ្ដាលមកកាន់កាឡាក់ស៊ីរបស់យើង ដែលមានចម្ងាយជាង២លានឆ្នាំពន្លឺពីគ្នា។

វង់រស្មីពណ៌ស្វាយដែលគេមើលឃើញ ពីកាឡាក់ស៊ីអ៊ីនដ្រូមីដា ឬកាឡាក់ស៊ីបាំងឆ័ត្រ

ការពិតទៅ កាឡាក់ស៊ីនានាបានប៉ះទង្គិចគ្នា ហើយបានរួមបញ្ចូលគ្នាកាលពី៤ពាន់លានឆ្នាំមុន នៅក្នុងកាឡាក់ស៊ីអ៊ីនដ្រូមីដា។ ការរួមបញ្ចូលគ្នានេះនឹងបង្កើតជាកាឡាក់ស៊ីរាងអេលីបធំមួយ ហើយការពង្រីកខ្លួនរបស់វង់រស្មីកាឡាក់ស៊ីអ៊ីដ្រូមីដាមកកាន់ពួកយើង វាកំពុងមានឥទ្ធិពលមកលើវង់រស្មីនៃកាឡាក់ស៊ីរបស់យើង។ វង់រស្មីនៃកាឡាក់ស៊ីអ៊ីនដ្រូមីដាមានស្រទាប់សំបុកឧស្ម័នពីរ ដែលបង្កើតជាសម្បកខុសគ្នា។

ទីតាំងវង់រស្មីរបស់កាឡាក់ស៊ីមីលគីវ៉េ នៅអវកាស

ក្រុមអ្នកស្រាវជ្រាវបានរកឃើញធាតុធុនធ្ងន់ នៅក្នុងវង់រស្មីកាឡាក់ស៊ីអ៊ីនដ្រូមីដា ដែលទំនងជាបានបញ្ចេញពីផ្នែកខាងក្នុងនៃផ្កាយ នៅពេលបានផ្ទុះក្នុងព្រឹត្តិការណ៍ស៊ូពែណូវ៉ា។ បើមើលពីលក្ខណៈស្រដៀងគ្នានៃកាឡាក់ស៊ីទាំងពីរ ការស្វែងយល់អំពីវង់រស្មីរបស់កាឡាក់ស៊ីអ៊ីនដ្រូមីដាអាចជួយស្រាយបំភ្លឺ លើវង់រស្មីរបស់កាឡាក់ស៊ីមីលគីវ៉េដែលអ្នកគេពិបាកសិក្សា ពីព្រោះពួកយើងស្ថិតនៅខាងក្នុងមីលគីវ៉េ៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]