លោក Jose Mourinho គ្រូបង្វឹកក្រុម Tottenham Hotspur កំពុងចរចាចង់បានខ្សែប្រយុទ្ធរូបនេះ

យោងតាមសារព័ត៌មាន Talksport បានឲ្យដឹងថាលោក Jose Mourinho គ្រូបង្វឹកក្រុម Tottenham Hotspur ចង់ពង្រឹងត្រង់តំបន់ប្រយុទ្ធរបស់ខ្លួនដោយចង់បានកីឡាករ Josh King ពីក្រុម AFC Bournemouth។

ក្រុមដែលមានមូលដ្ឋាននៅភាគខាងជើងទីក្រុងឡុងដ៍នេះចង់បានខ្សែប្រយុទ្ធម្នាក់បន្ថែមទៀត ទោះបីជាមានកីឡាករ Harry Kane ក៏ដោយ។ យ៉ាងណាមិញក្រុម Tottenham Hotspur ក៏ធ្លាប់មានការចាប់អារម្មណ៍លើកីឡាករ Callum Wilson ពីមុនផងដែរ ប៉ុន្តែពេលនេះក្លិបកំពុងតែប្តូរការចាប់អារម្មណ៍ទៅលើកីឡាករ Josh King វិញ។  

គេជឿជាក់ថា ភ្នាក់ងាររបស់កីឡាកររូបនេះបានចរចាគ្នាជាមួយនឹងក្រុម Tottenham Hotspur រួចហើយ។ គួរបញ្ជាក់ផងដែរថា កីឡាករ Josh King ក៏ធ្លាប់ទទួលបានការចាប់អារម្មណ៍ពីក្រុម Manchester United ផងដែរ ប៉ុន្តែក្រុមបិសាចក្រហមមួយនេះបានបដិសេធនូវតម្លៃខ្លួន ២០ លានផោនរបស់កីឡាកររូបនេះ៕