យន្តហោះចម្បាំងរុស្ស៊ី២គ្រឿង ស្ទាក់យន្តហោះអាមេរិក B-52 លើដែនសមុទ្រខ្មៅ (មានវីដេអូ)

បរទេស៖ កងកម្លាំងយោធាអាមេរិកបានឱ្យដឹងថា កាលពីថ្ងៃសុក្រកន្លងទៅនេះ ប្រទេសរុស្ស៊ីបានបញ្ជូនយន្តហោះចម្បាំងរបស់ខ្លួន ២គ្រឿងឈ្មោះថា Su-27 Flanker ដើម្បីឱ្យទៅស្ទាក់យន្តហោះទម្លាក់គ្រាប់បែកអាមេរិក B-52 លើដែនទឹកអន្តរជាតិនៅសមុទ្រខ្មៅ។ ​

​​យន្តហោះចម្បាំងរុស្ស៊ី បានបើកកាត់មុខយន្តហោះ B-52 ក្នុងរយៈចម្ងាយប្រហែល ៣០ម៉ែត្រជាច្រើនដង​លើដែនទឹកអន្តរជាតិនៅសមុទ្រខ្មៅ ដែលបង្កជាភាពជ្រួលច្របល់ ហើយត្រូវកងកម្លាំងសហរដ្ឋអាមេរិករិះគន់ថា ទ័ពអាកាសរុស្ស៊ីបើក​យន្តហោះ ដោយមិនគោរពតាមគោលការ​ណ៍សុវត្ថិភាព និងគ្មានវិជ្ជាជីវៈ។

យោងតាមកងទ័ពអាកាសអាមេរិកបានឱ្យដឹងថា ​យន្តហោះរបស់អាមេរិកតែងហោះល្បាត​នៅក្នុងតំបន់ដែនទឹកអន្តរជាតិនេះជាប្រចាំ។  ហើយកាលពីថ្ងៃសុក្រ​ យន្តហោះទម្លាក់គ្រាប់បែក B-52 Stratofortress បានហោះហើរពីលើប្រទេស ដែលជាសមាជិកអង្គការណាតូចំនួន៣០ អមដោយយន្ដហោះសម្ព័ន្ធមិត្ត នៅក្នុងពិធីបង្ហាញពីសាមគ្គីភាព៕