ស្ត្រីអូស្ត្រាលីម្នាក់ភ័យមិនស្ទើរនោះទេ ក្រោយឃើញ ពស់ ៤ ក្បាលសំងំនៅកន្លែងមួយនេះ

អូស្ត្រាលី៖ នាង Sofie Pearson រស់នៅក្នុងកសិដ្ឋានមួយនៅរដ្ឋឃ្វីនលែន បានចែករំលែកការបង្ហោះសារតាមហ្វេសប៊ុកពីការរកឃើញពស់៤ក្បាលដ៏គួរឱ្យខ្លាច បន្ទាប់ពីបង្គន់ដំណើរការមិនល្អ។

នាងបានប្រាប់ 7News ថា “ខ្ញុំបានប្រើប្រាស់បន្ទប់ទឹក ហើយបន្ទាប់មកក៏ចុចប៊ូតុងទឹក ប៉ុន្តែវាដូចជាទាក់នៅត្រង់ណាមិនដឹង ខ្ញុំក៏ចាប់ផ្តើមឆ្ងល់” ។ Sofie Pearson គ្រាន់តែដឹងថា ទឹកមិនហូរតាមសម្រួល រហូតទាល់តែនាងឱនមើលទៅក្នុងកន្លែងចុចប៊ូតុងទឹក នាងបានរកឃើញពស់វែកបួនក្បាលមានប្រវែងរហូតដល់មួយម៉ែត្រៗ។

នាងបាននិយាយថា “ខ្ញុំមើលប្រហែលមួយវិនាទី ហើយស្ទើរមិនជឿខ្លួនឯង”។ Sofie បានយកទូរស័ព្ទរបស់នាងដើម្បីថតមុនពេលហៅមិត្តភក្តិឱ្យជួយនាង ព្រោះនាងមិនខ្ចីទៅប៉ះពស់ទាំងនោះឡើយ។ នៅលើហ្វេសប៊ុក Sofie បានសរសេរថា“ បួន…មានរហូតដល់បួនក្បាល…កំពុងតែឆ្ងល់ថាហេតុអ្វីបានជាបង្គន់ខ្ញុំពិបាកហូរទឹកខ្លាំងម្ល៉េះ!"។

មិត្តភក្តិ Sofie មួយចំនួនបានតបសារ ដោយណែនាំនាងឱ្យដុតផ្ទះចោល ហើយម្នាក់ទៀតនិយាយថា "ហាហា! ខ្ញុំរំពឹងថានឹងមានតែមួយ តែមិនដែលគិតថាមានដល់ទៅបួនទេ"៕

ប្រភព៖ Mirror