ចិន៖ ថ្មីៗនេះ ស្រាប់តែមានរឿងដ៏ភ្ញាក់ផ្អើលខ្លាំង បន្ទាប់ពីតារាសម្ដែងប្រុស លោក Nicky Wu បានចូលរួមនៅក្នុងកម្មវិធីទូរទស្សន៍មួយ ដែលខណៈពេលកំពុងតែថតកម្មវិធី លោកក៏បានត្រូវបានឡោមព័ទ្ធដោយសន្តិសុខចំនួន ៦ នាក់ ដែលជារឿងមួយត្រូវបានមនុស្សជាច្រើន លើកមកនិយាយនៅលើបណ្តាញសង្គម។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សដោយឡែក នៅក្នុងកម្មវិធីនេះ ត្រូវបានគេដឹងថា អ្នកដឹកនាំកម្មវិធី បានរៀបចំឲ្យ លោក Nicky Wu ដើរតួជាមនុស្សអាថ៌កំបាំង ដោយធ្វើការបន្លំខ្លួនស្លៀកសម្លៀកបំពាក់ពណ៌ខ្មៅ ថែមទាំងមាន មួក និងរបាំងមុខ ព្រមទាំងនាំយកកាមេរ៉ា ដែលមិនមានអ្នកណាម្នាក់អាចចំណាំថាជារូបលោក ផងដែរ។
យ៉ាងណាមិញ នៅក្នុងភាពច្របូកច្របល់នៅកន្លែងកើតហេតុ ដោយសារតែមានផ្សែង ថែមទាំងមានភ្ញៀវដែលបានទៅកម្សាន្តនៅកន្លែងនោះ បានស្រែកយ៉ាងខ្លាំង ធ្វើឲ្យសន្តិសុខ ៦ នាក់ បានទៅព័ទ្ធជុំវិញ លោក Nicky Wu ភ្លាមៗ ព្រោះពួកគេយល់ច្រឡំថា លោកជាអ្នកគាំទ្រដែលមានបញ្ហា ចង់តាមយាយីអ្នកសិល្បៈផ្សេងៗទៀត ។
ប៉ុន្តែ បន្ទាប់ពីបានឃើញបែបនេះ ខាងក្រុមការងាររបស់កម្មវិធីបានស្រែកប្រាប់ជាបន្ទាន់ថា រូបលោកគឺជាតារាដ៏ល្បីល្បាញម្នាក់ ហើយសូមឲ្យខាងសន្តិសុខប្រលែងរូបលោក ថែមទៀតផង។ យ៉ាងណាមិញ ទោះយ៉ាងណាមិនមានបញ្ហាអ្វីធំដុំក៏ដោយ តែក៏មានមនុស្សជាច្រើន បានសម្តែងការព្រួយបារម្ភ ចំពោះតារាសម្តែងរូបនេះ ថាអាចនឹងរងរបួស ជាពិសេស ក៏បានធ្វើការរិះគន់ចំពោះ ក្រុមការងារដែលមិនបានធានាសុវត្ថិភាពដល់ភ្ញៀវដែលបានចូលរួមនៅក្នុងកម្មវិធី ចំពោះរឿងហេតុដែលអាចកើតឡើង ដោយអចេតនា ផងដែរ៕