ចិនព្រមានសហរដ្ឋអាមេរិកឱ្យឈប់បង្ករឿងនៅសមុទ្រចិនខាងត្បូង

ប៉េកាំង៖ លោកវរសេនីយឯក លី ហួរមិន (Li Huamin) អ្នកនាំពាក្យ​កងទ័ពរំដោះប្រជាជនចិន (PLA) បាននិយាយនៅក្នុងសេចក្តីថ្លែងការណ៍មួយថា កាលពីថ្ងៃព្រហស្បតិ៍ម្សិលមិញនេះ កងកម្លាំងយោធាចិនបានតាមឃ្លាំមើលនាវាចម្បាំងអាមេរិកមួយគ្រឿង ដែលចូលក្នុងដែនទឹកចិនដោយគ្មានការអនុញ្ញាត ហើយត្រូវបានព្រមានឲ្យចាកចេញពីដែនទឹកប្រទេសចិនជាបន្ទាន់។

នៅក្នុងសេចក្តីថ្លែងការណ៍ លោក លី បានគូសបញ្ជាក់ថា ការព្រមាននេះត្រូវធ្វើឡើង បន្ទាប់ពីនាវាចម្បាំង USS Mustin បានបើកចូលដែនទឹកនៅជិតកោះ Xisha នៅសមុទ្រចិនខាងត្បូងកាលពីថ្ងៃព្រហស្បតិ៍ ដោយគ្មានការអនុញ្ញាតពីប្រទេសចិន ហើយទង្វើបែបនេះ គឺជាឥរិយាបទមិនគួរគប្បី ​និងជាការរំលោភលើច្បាប់អន្តរជាតិ។

លោក លី បន្តថា កម្លាំងយោធាចិននឹងបន្តឃ្លាំមើលដែនតាមដែនទឹក និងដែនអាកាសរបស់ប្រទេសចិនយ៉ាង​យកចិត្តទុកដាក់បំផុត ដើម្បីការពាររាល់ឧប្បត្តិហេតុណាមួយ ដែលអាចបង្កគ្រោះថ្នាក់ដល់សន្តិសុខជាតិចិន និងការពារអធិបតេយ្យភាពជាតិ៕