ដោះ​ចីវរចេញ​នាំគ្នា​មក​ច្រៀង​ខារ៉ាអូខេ​ត្រឡប់​ទៅ​វិញ​​បើក​ម៉ូតូ​បុក​ដើម​​ឈើ​ស្លាប់​១ របួស​២

ខេត្តតាកែវ ៖ យ៉ាងហោចណាស់លោកសង្ឃ១អង្គ បានស្លាប់ភ្លាមៗនៅនឹងកន្លែង និង២អង្គទៀតរងរបួសធ្ងន់ ហើយត្រូវបានប៉ូលិសហៅ រថយន្តសង្គ្រោះរបស់មន្ទីរពេទ្យបង្អែក ខេត្តដឹកយកទៅសង្គ្រោះ ខណៈសង្ឃកំហូច និងបក្សពួកមកច្រៀង ខារ៉ាអូខេនៅរ៉ារថភ្លើង លុះពេលត្រឡប់ទៅវិញក៏បានជិះម៉ូតូឌុបគ្នា បើកបោះពួយយ៉ាងលឿន ដើម្បីកុំឱ្យភ្លឺទាន់ តែជាអកុសលក៏រេចង្កូតទៅ បុកដើមឈើក្បែរថ្នល់តែម្តង។

ហេតុការណ៍នេះបានកើតឡើង នៅតាមបណ្តោយផ្លូវជាតិលេខ២ ចន្លោះបង្គោល គីឡូម៉ែត្រលេខ៦៥-៦៦ ស្ថិតក្នុងភូមិក្តុល ឃុំលំចង់ ស្រុកសំរោង។លោកអនុសេនីយ៍ឯក វង់ ង៉ែត អធិការរងនគរបាលស្រុកសំរោងបានឱ្យដឹងថា ជនរងគ្រោះដែលស្លាប់ឈ្មោះស៊ីវ សំណាង ភេទប្រុស អាយុ១៩ឆ្នាំ ជាសង្ឃបួសនៅវត្តកំហែង ឃុំព្រៃផ្គាំ ស្រុកអង្គរបុរី បានស្លាប់ភ្លាមៗនៅនឹងកន្លែង ចំណែកអ្នករងរបួសឈ្មោះនីវ បញ្ញា ភេទប្រុស អាយុ២១ឆ្នាំ ជាសង្ឃបួសនៅវត្តជាមួយគ្នា រងរបួសធ្ងន់បាក់ជើងខាងស្តាំ ៕

បញ្ចូលអត្ថបទ ៖ បុប្ផា កោះ

ផ្តល់សិទ្ធដោយ កោះសន្តិភាព