ខ្លាំងមែន! បាក់តេរីមួយនេះអាចធន់នឹងវិទ្យុសកម្ម ហើយអ្នកវិទ្យាសាស្ត្រភ័យព្រួយថា វាអាចឆ្លងទៅភពអង្គារទៀត

ជប៉ុន៖ ការស្រាវជ្រាវថ្មីមួយបានបង្ហាញថា បាក់តេរីមួយប្រភេទដែលមានភាពធន់នឹងវិទ្យុសកម្ម និងគ្រោះថ្នាក់ដល់បរិស្ថានដទៃទៀត អាចរស់រានមានជីវិតនៅខាងក្រៅស្ថានីយអវកាសអន្តរជាតិ រយៈពេល៣ឆ្នាំ។ បេសកកម្ម Tanpopo របស់ជប៉ុនបានរួមបញ្ចូលទាំងបាក់តេរី Deinococcus ស្ងួតនៅក្នុងចានអាលុយមីញ៉ូម ដែលបានដាក់នៅខាងក្រៅស្ថានីយអវកាស។

បាក់តេរី Deinococcus ត្រូវបានគេរកឃើញនៅលើផែនដី ហើយត្រូវបានដាក់ឈ្មោះហៅក្រៅថា Conan the Bacterium ដោយក្រុមអ្នកវិទ្យាសាស្ត្រ ដោយសារសមត្ថភាពរបស់វាក្នុងការរស់រានក្នុងស្ថានភាពត្រជាក់ ខ្សោះជាតិទឹក និងអាស៊ីត។ វាត្រូវបានគេស្គាល់ថា ជាទម្រង់ជីវិតដែលធន់នឹងពន្លឺខ្លាំងជាងគេ ដែលបានកត់ត្រាក្នុងសៀវភៅកំណត់ត្រាពិភពលោក Guinness Book of World Records។

វាអាចធន់ទ្រាំ៣,០០០ដងទៅនឹងបរិមាណវិទ្យុសកម្ម ដែលអាចសម្លាប់មនុស្ស ហើយវាត្រូវបានគេញែកចេញពីកំប៉ុងសាច់ ដោយមានវិទ្យុសកម្មសម្លាប់មេរោគផងដែរ។ បេសកកម្មនេះត្រូវបានគេបង្កើតឡើង ដើម្បីធ្វើតេស្ដទ្រឹស្ដីដែលបង្ហាញថា អតិសុខុមប្រាណអាចឆ្លងពីភពមួយទៅភពមួយ ហើយអាចចម្លងទៅកាន់ជីវិតផ្សេងទៀត។

បាក់តេរី Deinococcus ក្នុងស្ថានីយអវកាស មិនបានអំណោយផលដល់ពួកវាទេ ដោយសារតែសំណើមដែលបង្កជាបញ្ហាដល់ពួកបាក់តេរី។ ដូច្នេះក្រុមអ្នកវិទ្យាសាស្ត្រត្រូវមានការប្រុងប្រយ័ត្នក្នុងការធ្វើដំណើរទៅភពអង្គារ ដែលអាចចម្លងបាក់តេរីពីផែនដី ទៅកាន់ជីវិតបរិស្ថានដទៃទៀត៕