អុីតាលី៖ បុរសវ័យចំណាស់ម្នាក់ ត្រូវគេពិន័យឲ្យបង់ប្រាក់ចំនួន ១៦៦អឺរ៉ូ (ឬប្រហែល ២០០ដុល្លារអាមេរិក) បន្ទាប់ពីអ្នកជិតខាងបានត្អូញត្អែរថា មាន់គករបស់គាត់ឆាប់រងាវពីព្រលឹមខ្លាំងពេក ដែលរំខានដល់ដំណេករបស់ពួកគេ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សលោក Angelo Boletti គឺជានិវត្ដជនអាយុ ៨៣ឆ្នាំ រស់នៅក្រុង Castiraga Vidardo នៃតំបន់ Lombardy ប្រទេសអុីតាលី ត្រូវគេរកឃើញថាបានរំលោភច្បាប់ក្នុងស្រុក ដែលចែងថាសត្វចិញ្ចឹមត្រូវដាក់យ៉ាងហោចណាស់ ១០ម៉ែត្រពីផ្ទះអ្នកជិតខាង ដើម្បីចៀសវាងបង្កសំឡេងរំខានផ្សេងៗ។ តែយ៉ាងណាមិញ មាន់គករបស់គាត់បានរងាវសំឡេងឮៗតាំងពីម៉ោង៤:៣០នាទីទាបភ្លឺ រហូតដល់ម៉ោងប្រហែល៦:០០ព្រឹកឯណោះ ដែលសំឡេងរបស់វា ធ្វើឲ្យអ្នកជិតខាងដឹងខ្លួន ខណៈពេលពួកគេកំពុងតែសម្រាន្ដលក់ស្រួល។
ជុំវិញករណីនេះ អភិបាលក្រុងលោក Emma Perfetti បានប្រាប់អ្នកកាសែតថា អាជ្ញាធរមូលដ្ឋានគ្មានជម្រើសអ្វីក្រៅពីចាត់វិធានកាលើបុរសជាម្ចាស់មាន់នោះទេ ដោយសារអ្នកជិតខាងជាច្រើន បានត្អូញត្អែរជារើយៗ។
យ៉ាងណាមិញ លោក Angelo Boletti បាននិយាយដែរថា គាត់បានចិញ្ចឹមវាអស់រយៈពេល១០ឆ្នាំមកហើយ មុនពេលគាត់ប្រគល់ឲ្យទៅមិត្តភក្ដិចិញ្ចឹមបន្ដ ដោយសារតែការត្អូញត្អែររបស់អ្នកជិតខាងនេះឯង។ ហើយគាត់ទើបយកវាត្រលប់មកផ្ទះវិញ និងបង្ខាំងវាទុកបណ្ដោះអាសន្នប៉ុណ្ណោះ ព្រោះមិត្តភក្ដិរបស់គាត់ដើរលេងកម្សាន្តរយៈពេល២០ថ្ងៃ។
ទោះជាយ៉ាងណា បុរសវ័យ៨៣ឆ្នាំរូបនេះ ក៏គ្រោងនឹងអំពាវនាវដល់អាជ្ញាធរផងដែរ ហើយសង្ឃឹមថាបទពិន័យនេះ នឹងត្រូវលុបចោលវិញ៕
សូមទស្សនារូបភាពខាងក្រោម៖