ប្រវត្ដិសាស្ត្រថ្មីរបស់មនុស្សលោក! បេសកកម្មរបស់យានអវកាសមួយនឹងចុះចត លើអាចម៍ផ្កាយ នៅក្រៅភពផែនដី

បរទេស៖ នៅសប្ដាហ៍នេះ យានអវកាស OSIRIS-REx បានធ្វើការហាត់សមជាលើកចុងក្រោយ ដែលវាចាំបាច់ត្រូវចុះចតលើអាចម៍ផ្កាយ Bennu និងប្រមូលសំណាកពីវា នៅប៉ុន្មានខែខាងមុខ។ ការប្រមូលនេះនឹងកើតឡើងនៅថ្ងៃទី២០ ខែតុលា ដែលធ្វើឲ្យវាក្លាយជាយានអវកាសដំបូងគេរបស់ណាសា ដើម្បីប្រមូលសំណាកពីអាចម៍ផ្កាយ ហើយបញ្ជូនវាមកផែនដីវិញ។

យាន OSIRIS-REx នឹងចាកចេញពីអាចម៍ផ្កាយ Bennu ក្នុងឆ្នាំ២០២១ នឹងវិលត្រឡប់មកផែនដីវិញ នៅខែកញ្ញាឆ្នាំ២០២៣ ដោយផ្ទុកសារធាតុស្ករ៣០កញ្ចប់ ដែលជាវត្ថុធាតុដើមពីអាចម៍ផ្កាយ។ ចាប់តាំងពីបានមកដល់អាចម៍ផ្កាយនេះ ក្នុងខែធ្នូ ឆ្នាំ២០១៨ បេសកកម្មយាន OSIRIS-REx របស់អង្គការណាសាបានធ្វើដំណើរតាមគន្លងអាចម៍ផ្កាយមួយនេះ និងបានកំណត់ផែនទីលើផ្ទៃរបស់វារួចស្រេច។

អាចម៍ផ្កាយ Bennu គឺស្ថិតនៅចម្ងាយ ២៨៨លានគីឡូម៉ែត្រពីផែនដី ប៉ុន្តែវាត្រូវបានគេចាត់ទុថា ជាអាចម៍ផ្កាយដែលនៅជិតផែនដី។ អាចម៍ផ្កាយមួយនេះអាចនឹងខិតមកកៀកផែនដី ជិតជាងចម្ងាយព្រះចន្ទ ក្នុងឆ្នាំ២១៣៥ ហើយវាមកកាន់តែកៀកមែនទែន ក្នុងឆ្នាំ២១៧៥និង២១៩៥។

ការបុកផែនដីដោយផ្ទាល់ប្រហែលជាមិនអាចកើតឡើងទេ ប៉ុន្តែទិន្នន័យដែលប្រមូលបានកំឡុងពេលបេសកកម្មនេះ អាចនឹងជួយកំណត់វិធីសាស្ត្រល្អៗ ដើម្បីបញ្ចៀសគ្រោះមហន្តរាយដោយសារតែអាចម៍ផ្កាយ។ សំណាកពីអាចម៍ផ្កាយ Bennu នឹងជួយអ្នកវិទ្យាសាស្ត្រឲ្យយល់ដឹង មិនត្រឹមតែអំពីអាចម៍ផ្កាយដែលអាចជះឥទ្ធិពលដល់ផែនដីប៉ុណ្ណោះទេ ប៉ុន្តែថែមទាំងអំពីរបៀបដែលភពនានានិងជីវិតបានចាប់ផ្ដើម៕