អង់គ្លេស៖ ក្លិបបិសាចក្រហម Manchester United បានដាក់តម្លៃខ្លួនខ្សែការពារសញ្ជាតិអង់គ្លេស Chris Smalling ក្នុងទំហំទឹកប្រាក់ចំនួន២០លានផោន (ឬប្រមាណ ២៦លានដុល្លារ)។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សរនាំងការពារវ័យ៣០ឆ្នាំ បានវិលត្រឡប់មកកាន់ទឹកដី Old Trafford វិញ កាលពីសប្ដាហ៍មុន ក្រោយចំណាយពេល១រដូវកាលទៅលេងឲ្យក្លិប Roma ក្នុងកិច្ចសន្យាខ្ចីជើង។
Smailling នៅសល់កុងត្រា ដែលទទួលបានប្រាក់ពលកម្ម ១សែន៣ម៉ឺនផោន ក្នុង១សប្ដាហ៍ពី Man UTD រយៈពេល២ឆ្នាំទៀត ប៉ុន្តែកីឡាកររូបនេះ ហាក់មិនស្ថិតក្នុងគម្រោងប្រើប្រាស់របស់អ្នកចាត់ការទូទៅលោក Ole Gunnar Solskajer នោះទេ ដូច្នេះមានន័យថា រូបគេទំនងអាចនឹងត្រូវក្លិបលក់ចេញមុនចប់កុងត្រា។
ជាមួយគ្នានេះ ក្លិប Roma និង Inter Milan ត្រូវបានគេរាយការណ៍មកថា មានបំណងចង់ផ្លាស់យក Smalling ជាអចិន្ត្រៃយ៍នៅទីផ្សាររដូវក្ដៅនេះ ខណៈរបាយការណ៍របស់កាសែត The Sun បានបញ្ជាក់ថា សាមីកីឡាករផ្ទាល់ក៏មានគំនិតចង់វិលត្រឡប់ទៅលេងនៅអ៊ីតាលីវិញផងដែរ ហើយគេនឹងយល់ព្រមកាត់បន្ថយប្រាក់ពលកម្ម ដើម្បីឲ្យក្លិបគីឡូធ្ងន់នៅ Serie A ទាំងពីរខាងលើ ពិចារណាចុះកុងត្រាយករូបគេទៅរួមក្រុម។
គួរឲ្យដឹងដែរថា ក្នុងរដូវកាលនេះ Smalling បង្ហាញខ្លួនឲ្យ Roma ៣៧ប្រកួត គិតរាល់ព្រឹត្តិការណ៍ទាំងអស់ ក្នុងនោះគេស៊ុតបាន៣គ្រាប់ និងបោះបាល់ឲ្យមិត្តរួមក្រុមសម្រេចទីបាន២ដង។ មិនត្រឹមតែប៉ុណ្ណោះ គេក៏បានជួយក្រុមបញ្ចប់រដូវកាលទៅ ក្នុងចំណាត់ថ្នាក់លេខ៥ផងដែរ ទទួលបានកៅអីទៅលេងនៅក្របខណ្ឌ Europa League ៕
ប្រភព៖ dailymail