បរទេស៖ ក្លិបសេះបង្កង់ Juventus ត្រូវបានគេរាយការណ៍មកថា មានចំណាប់អារម្មណ៍ ក្នុងការចុះកិច្ចសន្យាយកខ្សែប្រយុទ្ធក្រុមកាំភ្លើងធំ Arsenal កីឡាករ Alexandre Lacazette នៅរដូវក្ដៅនេះ ដោយគ្រោងដាក់សំណើដោះដូរកីឡាករ បូកថែមលុយជាថ្នូរ។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សLacazette ហាក់លេចធ្លោក្រោមការដឹកនាំរបស់អ្នកចាត់ការទូទៅលោក Mikel Arteta ខណៈរូបគេនៅសល់កុងត្រា២ឆ្នាំទៀត នៅទឹកដី Emirates ដូច្នេះមានន័យថា ជើងស៊ុតសញ្ជាតិបារាំងជាកីឡាករតែម្នាក់គត់ ដែលអាចឲ្យ Arsenal ទទួលបានប្រាក់កម្រៃច្រើន ប្រសិនបើលក់រូបគេចេញនៅទីផ្សាររដូវក្ដៅនេះ។
ជាមួយគ្នានេះ លោក Arteta ក៏ត្រូវបានថ្នាក់ដឹកនាំក្លិបប្រាប់ឲ្យ រៀបចំកាត់បន្ថយការចំណាយប្រាក់ពលកម្មទៅលើកីឡាករនៅរដូវក្ដៅនេះ ក្នុងនោះដែរ Lacazette អាចនឹងជាកីឡាករម្នាក់ ដែលគ្រូបង្វឹកសញ្ជាតិអេស្ប៉ាញ ត្រូវពិចារណាវ៉ៃចេញ ព្រោះរូបគេ ស្ថិតក្នុងចំណោមកីឡាករដែលទទួលបានប្រាក់ពលកម្មខ្ពស់ប្រចាំក្រុម ពោលគឺទទួលបាន១៨ម៉ឺនផោន (ឬប្រមាណ២៣ម៉ឺនដុល្លារ) ក្នុង១សប្ដាហ៍។
យ៉ាងណាមិញ យោងតាមការចុះផ្សាយរបស់កាសែត The Athletic ក្លិប Juventus បានត្រៀមរួចរាល់ក្នុងការចូលចែចូវយក Lacazette ក្នុងនោះពួកគេ ក៏ត្រៀមដាក់កីឡាករ៣រូប ដើម្បីឲ្យ Arsenal ជ្រើរើសជាថ្នូរដោះដូរ រួមមាន Gonzalo Higuain, Douglas Costa និង Cristian Romero ព្រមទាំងបូកបន្ថែមជាមួយនឹងលុយមួយចំនួនផងដែរ។
គួរឲ្យដឹងដែរថា ខ្សែប្រយុទ្ធវ័យ២៩ឆ្នាំ ត្រូវបាន Arsenal ទិញពីក្រុម Lyon មក ក្នុងតម្លៃ៥៣លានអឺរ៉ូ កាលពីឆ្នាំ២០១៧។ ដោយឡែកក្នុងរដូវកាលនេះ គេបង្ហាញខ្លួនក្នុងក្រុមលោក Arteta បានចំនួន៣០ប្រកួត ស៊ុតបញ្ចូលទីបាន១០គ្រាប់ និងបញ្ជូនបាល់ឲ្យមិត្តរួមក្រុមបញ្ចប់ទីបាន៦ដង៕
ប្រភព៖ dailymail