ចូល​ទៅ​កោស​ខ្យល់​ ខឹង​អត់​បាន​បន្ទប់​ម៉ាស៊ីន​​ត្រជាក់ ​ឈ្លោះ​ប្រកែក​​ជា​មួយ​អ្នក​កោស​ជប់ ​រហូត​ប្រើ​អំពើ​ហិង្សា​

រាជធានីភ្នំពេញ ៖ បុរស២នាក់ឈ្លោះប្រកែកគ្នា ជាមួយស្ត្រីអ្នកកោសខ្យល់ហើយបាន ហូតខ្សែក្រវាត់វាយស្ត្រីកោសជប់រងរបួស តែត្រូវស្ត្រីអ្នកកោសជប់ ព្រួតគ្នាវាយវិញបែកចិញ្ចើម ។ ហេតុការណ៍នេះបានកើតឡើងកាលពី វេលាម៉ោង១និង៤០នាទីរំលងអធ្រាត្រ ឈានចូលថ្ងៃទី២៧ មេសា នៅផ្ទះកោសជប់មួយកន្លែង ស្ថិតនៅតាមផ្លូវលេខ១១៣ កែងផ្លូវម៉ៅសេទុង សង្កាត់បឹងកេងកងទី៣ ខណ្ឌចំការមន ។

ប្រភពព័ត៌មានពីស្ត្រីជា អ្នកកោសជប់ដឹងថា មុនពេលកើតហេតុភ្ញៀវជាបុរស២នាក់ ស្ថិតក្នុងស្ថានភាពស្រវឹងបានចូល ទៅរកកោសខ្យល់ ហើយសួររកបន្ទប់ម៉ាស៊ីនត្រជាក់ ប៉ុន្តែពួកគាត់បានប្រាប់ថា បន្ទប់ម៉ាស៊ីនត្រជាក់ភ្ញៀវ ចូលពេញអស់ហើយ នៅសល់តែបន្ទប់កង្ហារ ធម្មតាប៉ុណ្ណោះ ពេលនោះបុរសទាំង២នាក់នោះ ក៏ព្រមចូលទៅដេកឱ្យកោសជប់។ នៅពេលកោសជប់បាន មួយចំហៀងខ្នងជិតរួចរាល់ហើយ ស្រាប់តែបុរសទាំង២នាក់នោះមិ នដឹងជានឹកឃើញយ៉ាងម៉េច ស្រាប់តែស្ទុះងើបមកឈ្លោះ ប្រកែកជាមួយស្ត្រីជាអ្នកកោសជប់ ដោយ និយាយថា មើលងាយពួកគាត់មិនព្រមឱ្យ ពួកគេចូលក្នុងបន្ទប់ម៉ាស៊ីនត្រជាក់ ហើយបានហូតខ្សែ ក្រវាត់វាយទៅលើស្ត្រីជាអ្នកកោសជប់នោះ តែពួកនាងបាននាំគ្នាវាយវិញ បណ្តាលឱ្យបែកចិញ្ចើម៕

បញ្ចូលអត្ថបទ ៖ បុប្ផា កោះ

ផ្តល់សិទ្ធដោយ កោះសន្តិភាព