បរទេស៖ ប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃអាទិត្យថា គណបក្សកាន់អំណាចរបស់កូរ៉េខាងជើង បានបញ្ជូនកញ្ចប់ជំនួយពិសេស រួមមានស្បៀងអាហារ និងឧបករណ៍វេជ្ជសាស្ត្រផ្សេងៗ ទៅដល់ប្រជាជនដែលរស់នៅក្នុងទីក្រុង Kaesong ជិតព្រំដែនកូរ៉េខាងត្បូង បន្ទាប់ពីត្រូវបានបិទទ្វារ ដោយសារបញ្ហាបារម្មណ៍ពីការឆ្លងរាលដាលនៃជំងឺកូវីដ១៩។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សមេដឹកនាំកូរ៉េខាងជើង លោក គីម ជុងអ៊ុន បានប្រកាសអាសន្ន និងសម្រេចឱ្យបិទទីក្រុង Kaesong ក្បែរព្រំដែនកាលពីខែមុន បន្ទាប់ពីបុរសម្នាក់ ដែលរត់ទៅកូរ៉េខាងត្បូងកាលពីឆ្នាំ ២០១៧ បានធ្វើដំណើរឆ្លងកាត់ព្រំដែនចូលមកទីក្រុង Kaesong វិញ ហើយត្រូវបានអាជ្ញាធរធ្វើតេស្តរកឃើញរោគសញ្ញាដូចទៅនឹងជំងឺកូវីដ១៩។
ទីក្រុងព្យុងយ៉ាងមិនទាន់បានបញ្ជាក់ពីករណីឆ្លងនៃជំងឺកូវីដ១៩ ណាមួយនៅឡើយទេ ប៉ុន្តែអាជ្ញាធរបាននឹងកំពុងចាត់វិធានការរក្សាគម្លាត និងបង្កើនការតាមដានសុខភាពក្នុងទីក្រុងយ៉ាងតឹងរ៉ឹង ហើយព្រមទាំងបានផ្តល់នូវឧបករណ៍ធ្វើតេស្ត ក៏ដូចជាឧបករណ៍វេជ្ជសាស្ត្រផ្សេងៗទៀត។
សូមជម្រាបដែរថា រហូតមកដល់ពេលនេះ អាជ្ញាធរកូរ៉េខាងជើងមិនទាន់បញ្ជាក់ជាផ្លូវការ ថាតើបុរសដែលត្រឡប់មកទីក្រុង Kaesong វិញនោះ មានផ្ទុកជំងឺកូវីដ១៩ ឬយ៉ាងណានោះទេ។ ប៉ុន្តែបើតាមមន្ត្រីសុខាភិបាលកូរ៉េខាងត្បូង បានឱ្យដឹងថា មុនពេលឆ្លងកាត់ព្រំដែន បុរសម្នាក់នោះត្រូវបានគេធ្វើតេស្ត ដោយរកមិនឃើញរោគសញ្ញាជំងឺកូវីដ១៩ទេ ហើយចំណែកមនុស្ស ២នាក់ទៀត ដែលមានទំនាក់ទំនងជិតស្និទ្ធជាមួយគាត់ ក៏មិនមានលទ្ធផលវិជ្ជមាននៃកូវីដ១៩ដែរ៕