យ៉ាងហោចណាស់ ១៨នាក់ស្លាប់ ក្រោយយន្តហោះឥណ្ឌាមួយគ្រឿងបានរត់រអិលចេញពីផ្លូវពេលកំពុងចុះចត (មានវីដេអូ)

ឥណ្ឌា៖ បើតាមភ្នាក់ងារ CNN បានផ្សាយកាលពីម្សិលមិញថា យន្តហោះរបស់ក្រុមហ៊ុនអាកាសចរណ៍ Air India Express មួយគ្រឿងបានធ្លាក់នៅរដ្ឋ Kerala នៃប្រទេសឥណ្ឌាខាងត្បូង បន្ទាប់ពីបានរត់ចេញពីផ្លូវ ហើយដាច់ជាពីរកំណាត់ ខណៈពេលចុះចតនៅអាកាសយាន្តដ្ឋានអន្តរជាតិ Kozhikode Calicut Airport។

ក្នុងហេតុការណ៍គ្រោះថ្នាក់នោះ លោក CV Anand បានបញ្ជាក់ថា មានមនុស្សយ៉ាងហោចណាស់ចំនួន ១៨នាក់បានស្លាប់ រួមទាំងអាកាសយានិក០២នាក់ និង ៣០នាក់ផ្សេងទៀតរបួលធ្ងន់ធ្ងរ ហើយកំពុងសម្រាកព្យាបាលនៅមន្ទីរពេទ្យ។

រដ្ឋមន្រ្តីអាកាសចរណ៍ស៊ីវិលលោក Hardeep Singh Puri បានឲ្យដឹងថា ជើងហោះហើរលេខ IX-1344 ដែលបានហោះហើរពីទីក្រុងឌូបៃ ទៅ Kizhikode Calicut Airport ដែលមានផ្ទុកមនុស្សចំនួន ១៩០នាក់ នៅលើយន្តហោះ Air India Express ដោយបានហោះហួសផ្លូវហោះហើរក្នុងស្ថានភាពវស្សា “បានធ្លាក់ចុះក្នុងកម្ពស់ ៣៥ ហ្វីតទៅក្នុងជម្រាលមួយមុនពេលបែកជាពីរបំណែក”។

គួរបញ្ជាក់ផងដែរថា ក្នុងចំណោមមនុស្ស ១៩០នាក់ មានអ្នកដំណើរចំនួន ១៧៤នាក់ ទារក ១០នាក់ អ្នកបើកយន្តហោះ ២នាក់ និងក្រុមយានិក ៤នាក់ នៅលើយន្តហោះនោះ៕

សូមទស្សនាវីដេអូខាងក្រោម៖