Pep ចាយសាហាវណាស់! ទិញបាន Torres និង Ake ហើយ នៅត្រូវការកីឡាករតម្លៃកប់ពពក២រូបនេះទៀត

អង់គ្លេស៖ បើតាមរបាយការណ៍របស់គេហទំព័រ Sky Sports បានឲ្យដឹងថាក្លិបអ្នកមាន Manchester City មានគម្រោងទិញកីឡាករថ្មីចំនួន៤នាក់មករួមក្រុមនៅរដូវក្ដៅនេះ។ ហើយថ្មីៗនេះក្លិបទិញបានតារាឆ្នើម២រូបរួចមកហើយ គឺកីឡាករ Farran Torres ពីក្លិប Valencia ក្នុងតម្លៃខ្លួន២១លានផោន (ឬប្រមាណ២៧លានដុល្លារ) និងកីឡាករ Nathan Ake ពីក្លិប Bournemouth ក្នុងតម្លៃខ្លួន៤១លានផោន (ឬប្រមាណ៥៤លានដុល្លារ)។ 

ដោយឡែកនៅមានកីឡាករតម្លៃខ្លួនកប់ពពកពីររូបទៀតដែលកំពុងស្ថិតក្នុងបញ្ជីរបស់លោក Pep Guardiola ។ ក្នុងនោះ Man City កំពុងតែតាមទិញតារាជើងស៊ុតរបស់ក្លិប Inter Milan កីឡាករ Lautaro Martinez ដែលជាគោលដៅទី១របស់ក្លិបអ្នកមានបុណ្យ Barcelona ដែរនោះ និងមួយរូបទៀតគឺខ្សែការពារ Kalidou Koulibaly របស់ក្លិប Napoli ។

សរុបទៅក្លិបជើងឯករង Premier League មួយនេះត្រូវចំណាយប្រហែលជាង២០០លានផោន (ឬប្រមាណ២៦០លានដុល្លារ) ឯណោះ ដើម្បីអាចនាំយកកីឡាករកំពុងឡើងជើងទាំងពីរនេះមកកាន់ទឹកដី Etihad ៕ 

ប្រភព៖ sportsmole