បៃរូត៖ ប្រទេសលីបង់បានប្រកាសកាន់ទុក្ខរយៈពេល៣ថ្ងៃ បន្ទាប់ពីហេតុការណ៍ផ្ទុះឃ្លាំងដាក់សារធាតុអាម៉ូញ៉ូមនីត្រាត បានកើតឡើងកាលពីថ្ងៃអង្គារ ដែលបណ្តាលឱ្យចំនួន ៧៨នាក់ស្លាប់ និងជាង ៤,០០០នាក់ផ្សេងទៀត ត្រូវរងរបួសធ្ងន់ស្រាល។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សប្រធានាធិបតីលីបង់ លោក Michel Aoun បានធ្វើការស្តីបន្ទោសចំពោះការធ្វេសប្រហែស ដែលយកសារធាតុអាម៉ូញ៉ូមនីត្រាតចំនួន ២,៧៥០តោន ទៅរក្សាទុកក្នុងឃ្លាំងអស់រយៈពេល ៦ឆ្នាំ ដោយមិនមានវិធានការការពារសុវត្ថិភាពឱ្យបានត្រឹមត្រូវ។ ទន្ទឹមនឹងនេះ លោកក៏បានកោះប្រជុំគណៈរដ្ឋមន្រ្តីបន្ទាន់ ដែលបានរៀបចំឡើងនៅថ្ងៃពុធនេះ ហើយគ្រោងធ្វើការប្រកាសអាសន្នចំនួនពីរសប្តាហ៍ ព្រមទាំងធ្វើពិធីកាន់ទុក្ខរយៈពេល៣ថ្ងៃ ដោយគិតចាប់ពីថ្ងៃពុធនេះទៅ។
គួរឱ្យដឹងដែរថា រហូតមកទល់ពេលនេះ ក្រុមអ្នកជួយសង្គ្រោះនៅតែបន្តរុករកមនុស្សតាមគំនរបាក់បែក ខណៈដែលចំនួនអ្នកស្លាប់ ត្រូវបានគេរំពឹងថានឹងកើនឡើងបន្ថែមទៀត។ ជាមួយគ្នានេះដែរ ប្រធានាធិបតីលីបង់ ក៏បានប្រកាសផងដែរថា រដ្ឋាភិបាលនឹងបញ្ចេញកញ្ចប់ថវិកាបន្ទាន់ចំនួន ៦៦លានដុល្លារអាមេរិក ដើម្បីជួយសម្រួលដល់ជនរងគ្រោះ៕