អាមេរិក៖ ក្រុមហ៊ុនបច្ចេកវិទ្យាយក្សរបស់អាមេរិក Microsoft បានបញ្ជាក់ថា ខ្លួនកំពុងបន្តពិភាក្សាដើម្បីទិញយកកម្មវិធីចែករំលែកវីដេអូតិកតុក ដែលគ្រប់គ្រោងដោយប្រទេសចិន។ ក្រុមហ៊ុនបច្ចេកវិទ្យាមួយនេះបាននិយាយថា លោក Satya Nadella ប្រធានក្រុមហ៊ុន Microsoft បានធ្វើការសន្ទនាជាមួយប្រធានាធិបតី ដូណាល់ ត្រាំ អំពីការទិញយកកម្មវិធីនេះ កាលពីថ្ងៃអាទិត្យ។

ប្រធានាធិបតី ដូណាល់ ត្រាំ និងលោក Satya Nadella

ក្រុមហ៊ុនបានបន្ថែមទៀតថា ការពិនិត្យសុវត្ថិភាពពេញលេញនៃកម្មវិធី នឹងត្រូវធ្វើឡើង។ ក្រុមហ៊ុន Microsoft បានប្រាប់ឲ្យដឹងនៅក្នុងប្លុក (blog) មួយថា ក្រុមហ៊ុនក៏នឹងត្រូវផ្ដល់ឲ្យរដ្ឋាភិបាល នូវបញ្ជីផលប្រយោជន៍សេដ្ឋកិច្ចពេញលេញ ដល់ប្រទេសនេះផងដែរ។ ក្រុមហ៊ុនបច្ចេកវិទ្យាយក្សនេះសង្ឃឹមថា នឹងបញ្ចប់ការពិភាក្សាជាមួយក្រុមហ៊ុនមេតិកតុក គឺ ByteDance ត្រឹមថ្ងៃទី១៥ ខែកញ្ញា។

ក្រុមហ៊ុន Microsoft បាននិយាយថា ខ្លួនកំពុងទិញសេវាកម្មតិកតុក នៅសហរដ្ឋអាមេរិក កាណាដា អូស្ត្រាលី និងនូវែលសេឡង់ ហើយនឹងដំណើរការកម្មវិធីនៅលើទីផ្សារប្រទេសទាំងនេះ។ ក្រុមហ៊ុន Microsoft បានសង្កត់ធ្ងន់ថា ខ្លួននឹងធានាថា រាល់ទិន្នន័យឯកជនរបស់អ្នកប្រើប្រាស់អាមេរិករបស់តិកតុក ត្រូវបានបញ្ជូននិងបន្តស្ថិតនៅសហរដ្ឋអាមេរិកដដែល។

កម្មវិធីតិកតុកដែលគ្រប់គ្រងដោយក្រុមហ៊ុន ByteDance របស់ចិន

លើសពីនេះទៅទៀត វានឹងធានាថារាល់ទិន្នន័យណាមួយដែលត្រូវបានរក្សាទុក ឬបម្រុងទុកនៅខាងក្រៅប្រទេស នឹងត្រូវបានលុបចេញពីម៉ាស៊ីនមេ បន្ទាប់ពីវាត្រូវបានផ្ទេរទៅមជ្ឈមណ្ឌលទិន្នន័យរបស់សហរដ្ឋអាមេរិក។ ប៉ុន្តែក្រុមហ៊ុនបច្ចេកវិទ្យាយក្សនេះបានបន្ថែមថា ការពិភាក្សានាពេលបច្ចុប្បន្ន ដើម្បីទិញតិកតុក ស្ថិតនៅក្នុងដំណាក់កាលបឋមនៅឡើយ ហើយដូច្នេះគ្មានការធានាណាមួយថា ការទិញនឹងបន្តទៅមុខទេ៕

បើមានព័ត៌មានបន្ថែម ឬ បកស្រាយសូមទាក់ទង (1) លេខទូរស័ព្ទ 098282890 (៨-១១ព្រឹក & ១-៥ល្ងាច) (2) អ៊ីម៉ែល [email protected] (3) LINE, VIBER: 098282890 (4) តាមរយៈទំព័រហ្វេសប៊ុកខ្មែរឡូត https://www.facebook.com/khmerload

ចូលចិត្តផ្នែក បច្ចេកវិទ្យា និងចង់ធ្វើការជាមួយខ្មែរឡូតក្នុងផ្នែកនេះ សូមផ្ញើ CV មក [email protected]

ចង់ក្លាយជាអ្នកសរសេរក្រៅម៉ោងមានប្រាក់ចំណូលសូមចុះឈ្មោះទីនេះ