កាន់តែច្រើន! ត្រឹមរយៈពេល២៤ម៉ោងសោះ ឥណ្ឌារក​ឃើញអ្នក​ឆ្លងកូវីដ១៩ជាង៥ម៉ឺននាក់​ និងអ្នកស្លាប់ជិត១ពាន់នាក់

ញូដេលី៖ យោងតាមទិន្នន័យ​របស់ក្រសួងសុខាភិបាល​ឥណ្ឌាបានបង្ហាញ​ថា នៅថ្ងៃច័ន្ទ ទី ៣ ខែសីហានេះ ​ប្រទេសឥណ្ឌាបានរកឃើញអ្នកឆ្លងជំងឺកូវីដ១៩ថ្មី​ ចំនួន ៥២,៩៧២នាក់ និងអ្នកស្លាប់ ៧៧១នាក់ ដែលធ្វើឱ្យតួលេខអ្នកឆ្លងសរុបឡើងដល់ ១,៨០៥,៨៣៨នាក់ ខណៈអ្នកស្លាប់កើនឡើងរហូតដល់ ៣៨,១៣៥នាក់។

បច្ចុប្បន្ន​​ ប្រទេស​ឥណ្ឌា​បានឡើងមកដល់ចំណាត់ថ្នាក់ទី៣ ក្នុងចំណោមប្រទេសដែលរងគ្រោះដោយជំងឺកូវីដ១៩ ខ្លាំងបំផុតនៅលើពិភពលោក ​ដូចជា សហរដ្ឋអាមេរិក និងប្រេស៊ីល។ ហើយដោយសារ​តែកង្វះខាតការធ្វើតេស្ត ការ​គោរពតាមវិធានការរក្សាគម្លាតពីសង្គម ក៏ដូចជាប្រព័ន្ធសុខាភិបាលនៅទន់ខ្សោយ ​​ទើបបណ្តាលឱ្យអ្នកឆ្លងនិងស្លាប់ដោយជំងឺកូវីដ១៩ នៅ​​ឥណ្ឌា ​បន្តកើនឡើងជាលំដាប់។

គួរ​ឱ្យដឹងដែរថា ​រហូតមកដល់ពេលនេះ ប្រទេសឥណ្ឌាមានអ្នកជាសះស្បើយ ១,១៨៨,៣៨៩នាក់ និងអ្នកកំពុងសម្រាកព្យាបាល ៥៧៩,២៧៣នាក់។ ហើយបើទោះបីករណីឆ្លងជំងឺដ៏កាចសាហាវ​នេះ នៅតែបន្តកើនឡើងយ៉ាងណា​ក៏ដោយ ក៏រដ្ឋាភិបាល​​​​ឥណ្ឌា ត្រូវសម្រេចប្រកាសបន្ធូរបន្ថយ​វិធានការបិទទ្វារប្រទេស​​ ដើម្បីកាត់បន្ថយផលប៉ះពាល់ដ៏ធំធេងទៅលើសេដ្ឋកិច្ច និងប្រជាជនក្រីក្រ៕