ចុមយក្ស! Arsenal គ្រោងបញ្ចេញកីឡាករឈុតធំ ៩នាក់នេះ ដើម្បីប្រមូលលុយទិញកីឡាករថ្មីៗ

អង់គ្លេស៖ ក្លិបកាំភ្លើងធំ​ Arsenal បានត្រៀមរួចរាល់ក្នុងការបញ្ចេញកីឡាករក្រុមឈុតធំជាច្រើនរូប ដើម្បីប្រមូលថវិការសម្រាប់ចាយវាយទិញកីឡាករថ្មីៗមកពង្រឹងក្រុម។

Arsenal ទើបផ្ដួលក្រុម Chelsea លើកពានរង្វាន់ FA រដូវកាល២០១៩/២០ កាលពីថ្ងៃសៅរ៍កន្លងទៅ ដូច្នេះមានន័យថា ពួកគេនឹងមានមុខក្នុងព្រឹត្តិការណ៍ ពានរង្វាន់ទ្វីអឺរ៉ុប លំដាប់ទី២ Europa League រដូវកាលក្រោយ។

ដើម្បីពង្រឹងក្រុមត្រៀមតតាំង ជាមួយក្រុមខ្លាំងៗរដូវកាលក្រោយ អ្នកចាត់ការទូទៅលោក Mikel Arteta មានគម្រោងបញ្ចេញកីឡាករចំនួន៩នាក់ ក្នុងនោះបញ្ជីកីឡាករដែលត្រូវដាក់លក់នៅទីផ្សាររដូវក្ដៅខាងមុខរួមមាន កីឡាករ  Alexandre Lacazette, Hector Bellerin, Sokratis, Matteo Guendouzi, Lucas Torreira, Henrikh Mkhitaryan, Sead Kolasinac,  Shkodran Mustafi និង Rob Holding ។ 

ដោយឡែកសម្រាប់គោលដៅនាំចូលរបស់ Arsenal មានចំនួន៣រូប មានដូចជាខ្សែបម្រើការពារក្រុម​ Atletico Madrid កីឡាករ Thomas Partey ខ្សែបម្រើក្រុម Barcelona កីឡាករ Philippe Coutinho និង កីឡាករជិតផុតត្រារបស់ក្រុមតោខៀវ Chelsea គឺម្ចាស់អាវលេខ១០ Willian។

ជាមួយគ្នានេះ Arsenal ក៏មានគម្រោងបន្តកិច្ចសន្យាខ្ចីជើងខ្សែបម្រើ  Dani Ceballos ពី Real Madrid និងកំពុងធ្វើការទៅលើកុងត្រាថ្មីរបស់ជើងស៊ុតប្រចាំក្រុម កីឡាករ Pierre-Emerick Aubameyang ផងដែរ ដោយរបាយការណ៍របស់កាសែត Daily Mail បានបញ្ជាក់ថា ក្នុងកុងត្រាថ្មីនោះ ក្លិបនៅភាគខាងជើងទីក្រុងឡុងដ៍ គ្រោងដំឡើងប្រាក់ពលកម្មឲ្យខ្សែប្រយុទ្ធជម្រើសជាតិកាបុងពី ១៨ម៉ឺនផោន (ឬប្រហែល ២៣មឺនដុល្លារ) ក្នុង១សប្ដាហ៍ ឡើងដល់ ២៥ម៉ឺនផោន (ឬប្រមាណ ៣២ម៉ឺនដុល្លារ) ក្នុង១សប្ដាហ៍ ៕

ប្រភព៖ dailymail