មកដឹងពីជីវប្រវត្តិខ្លះៗរបស់ម្ចាស់ស្បែកជើងមាសរដូវកាល ២០១៩-២០២០

បរទេស៖ ក្រោយបញ្ចប់រដូវកាល ២០១៩-២០២០ នៅ Serie A កីឡាករ Ciro Immobile បានក្លាយជាម្ចាស់ស្បែកជើងមាសប្រចាំទ្វីបអឺរ៉ុបជាលើកដំបូងក្នុងអាជីពរបស់គាត់ ដោយរកគ្រាប់បាល់បាន ៣៦ គ្រាប់នាំមុខ Robert Lewandoski ២ គ្រាប់ និង Cristiano Ronaldo ដល់ទៅ ៥ គ្រាប់។

Ciro Immobile កើតនៅថ្ងៃទី ២០ ខែកុម្ភៈ ឆ្នាំ ១៩៩០ ជាកីឡាករបាល់ទាត់អាជីពសញ្ជាតិអ៊ីតាលី ដែលដើរតួជាខ្សែប្រយុទ្ធរបស់ក្លិប Lazio និងក្រុមជម្រើសជាតិអ៊ីតាលីផងដែរ។

គាត់បានចាប់ផ្តើមអាជីពរបស់គាត់ជាថ្នាលយុវជននៅក្លិប Sorrento ពីឆ្នាំ ២០០២ ដល់ឆ្នាំ ២០០៨ ហើយនៅឆ្នាំ ២០០៩ គាត់ត្រូវបានក្លិប Juventus ទិញយក ប៉ុន្តែក្រោយមកគាត់ត្រូវបានដាក់ខ្ចីជើងទៅឱ្យក្លិបនៅក្របខ័ណ្ឌ Serie B រហូតដល់ទៅ ៣ ក្លិបរួមមាន Siena, Grisseto និង Pescara ដែលពេលគាត់បានឈ្នះពានរង្វាន់លីគក្នុងនាមជាកីឡាកររកគ្រាប់បាល់បានច្រើនជាងគេមុនពេលផ្លាស់ទៅក្លិប  Genoa ក្នុងឆ្នាំ ២០១២ ។

បន្ទាប់ពីលេងបានមួយរដូវកាលជាមួយ Genoa គាត់បានផ្លាស់ទៅកាន់ក្លិប Torino ដែលជាគូប្រជែងរបស់ក្លិប Juventus ។ នៅ Torino គាត់បានឈ្នះពានរង្វាន់ Capocannoniere សម្រាប់កីឡាកររកគ្រាប់បាល់បានច្រើនជាងគេនៅ Serie A ។ បន្ទាប់ពីបញ្ចប់រដូវកាលនៅ Torino គាត់ត្រូវបានលក់ទៅឱ្យក្លិបអាល្លឺម៉ង់ Borussia Dortmund ក្នុងតម្លៃប្រហែល ១៨ លានផោនក្នុងឆ្នាំ ២០១៤ ដែលនៅទីនោះគាត់បានឈ្នះពានរង្វាន់ DFL-Supercup មុនពេលផ្លាស់ទៅក្លិបអេស្ប៉ាញ Sevilla ក្នុងឆ្នាំ ២០១៥ ។

នៅឆ្នាំ ២០១៦ គាត់បានវិលត្រឡប់ទៅ Torino វិញក្នុងលក្ខខណ្ឌខ្ចីជើង ហើយក្រោយមកត្រូវបានលក់ទៅឱ្យក្រុម Lazio នៅខែកក្កដា ឆ្នាំ ២០១៦ នោះ។ ក្នុងរដូវកាលទី ២ របស់គាត់នៅ Lazio គាត់បានឈ្នះពានរង្វាន់ Capocannoniere ជាលើកទី ២ ដោយរកបាន ២៩ គ្រាប់ក្នុង ៣៣ ប្រកួត។ Immobile ក៏បានឈ្នះពានរង្វាន់ Coppa Italia និងពានរង្វាន់ Supercoppa Italiana ពីរដងជាមួយក្លិបនេះផងដែរ។

សម្រាប់ជម្រើសជាតិ Immobile បានបង្ហាញខ្លួនជាលើកដំបូងឱ្យអ៊ីតាលីក្នុងឆ្នាំ ២០១៤ ហើយត្រូវបានជ្រើសរើសប្រកួតក្នុងព្រឹត្តិការណ៍ FIFA World Cup 2014 និង UEFA Euro 2016 ផងដែរ៕