មិនធម្មតា! គ្រាន់តែចូលរួមគម្រោងសិក្សារបស់អង្គការណាសា សិស្សស្រីឥណ្ឌាពីរនាក់ អាចរកឃើញអាចម៍ផ្កាយមួយ ដែលកំពុងឆ្ពោះមកកាន់ផែនដី

ឥណ្ឌា៖ សិស្សសាលាឥណ្ឌាពីរនាក់បានរកឃើញអាចម៍មួយ ដែលកំពុងផ្លាស់ប្ដូរគន្លងរបស់វាយឺតៗ និងធ្វើដំណើរឆ្ពោះទៅកាន់ផែនដី។ Radhika Lakhani និង Vaidehi Vekariya អ្នកទាំងពីរកំពុងសិក្សានៅថ្នាក់ទី១០ ហើយកំពុងធ្វើការលើគម្រោងមួយរបស់សាលារៀន នៅពេលពួកគេបានរកឃើញអាចម៍ផ្កាយមួយ ដែលពួកគេបានដាក់ឈ្មោះឲ្យថា HLV2514។

ក្មេងស្រីទាំងនេះមកពីទីក្រុង Surat នៅភាគខាងលិចរដ្ឋ Gujarat របស់ឥណ្ឌា ហើយពួកគេទាំងពីរបានចូលរួមគម្រោងរបស់ Space India និងអង្គការណាសាផងដែរ ដែលអនុញ្ញាតឲ្យសិស្សានុសិស្សវិភាគរូបភាព ដែលថតដោយតេឡេទស្សន៍ស្ថិតនៅសកលវិទ្យាល័យហាវ៉ៃ។

លោក Aakash Dwivedi អ្នកសិក្សាជាន់ខ្ពស់និងជាតារាវិទូនៅមជ្ឈមណ្ឌល Space India បានប្រាប់សារព័ត៌មាន CNN ថា សិស្សានុសិស្សនៅប្រទេសឥណ្ឌាត្រូវបានបង្រៀនពីរបៀបមើលលំហអាកាស ដោយប្រើ software សម្រាប់ជួយវិភាគរូបភាពដែលប្រមូលបានពីតេឡេទស្សន៍ PAN Star របស់អង្គការណាសា និងបន្ទាប់មកសិស្សបានស្វែងរកអង្គ ដែលបានផ្លាស់ទីនៅក្នុងរូបភាព។

លោក Dwivedi បានពន្យល់ថា អាចម៍ផ្កាយនេះបច្ចុប្បន្នស្ថិតនៅជិតគន្លងរបស់ភពអង្គារ ប៉ុន្តែក្នុងរយៈពេល១លានឆ្នាំទៀត វានឹងផ្លាស់ប្ដូរគន្លងរបស់វា ហើយរំកិលទៅជិតផែនដី បើទោះបីជាវានឹងស្ថិតនៅចម្ងាយជាង១០ដង នៃចម្ងាយពីព្រះចន្ទទៅកាន់ផែនដីក៏ដោយ៕

• វិទ្យាសាស្រ្ត