ព្រឹត្តិការណ៍បាល់ទាត់ Liga MX ត្រូវបានពន្យារពេលដោយសារតែរង់ចាំរឿងមួយនេះ

ម៉ិចស៊ិក៖ អ្នករៀបចំព្រឹត្តិការណ៍បាល់ទាត់ Liga MX បាននិយាយនៅថ្ងៃពុធថា ការប្រកួតបាល់ទាត់របស់ប្រទេសម៉ិកស៊ិករវាក្លិប Atlas និងក្លិប Puebla ត្រូវបានពន្យារពេល ដោយសារតែនៅរង់ចាំលទ្ធផលនៃការធ្វើតេស្តរកជំងឺ COVID-១៩។

ការប្រកួតដែលត្រូវបានគ្រោងធ្វើនៅថ្ងៃសៅរ៍ទី ១ ខែសីហានេះនឹងត្រូវលើកទៅធ្វើនៅថ្ងៃចន្ទទី ៣ ខែសីហាវិញ នៅឯកីឡដ្ឋាន Jalisco របស់ក្លិប Atlas ក្នុងទីក្រុង Guadalajara ។

នៅក្នុងសេចក្តីថ្លែងការណ៍មួយអ្នករៀបចំព្រឹត្តិការណ៍ Liga MX បាននិយាយថា “ការសម្រេចចិត្តនេះត្រូវបានធ្វើឡើងពីព្រោះតែលទ្ធផលនៃការធ្វើតេស្តសម្រាប់ក្លិប Atlas នៅមិនទាន់ដឹងនៅឡើយ” ។ រដូវកាល Liga MX Apertura បានចាប់ផ្តើមកាលពីចុងសប្តាហ៍មុន បន្ទាប់ពីកីឡាបាល់ទាត់នៅក្នុងប្រទេសម៉ិកស៊ិកត្រូវបានផ្អាករយៈពេល ៤ ខែដោយសារការរាត្បាតនៃជំងឺ COVID-១៩។

គួរជម្រាបដែរថា ប្រទេសម៉ិកស៊ិកបានរាយការណ៍ថា មានករណីឆ្លងជំងឺ COVID-១៩ ជាង ៤០២,០០០ នាក់ និងមនុស្សជាង ៤៤,៨០០ នាក់បានស្លាប់៕

ប្រភព៖ ទីភ្នាក់ងារសារព័ត៌មានស៊ីនហួរ