ស្រវឹង​ទប់​ខ្លួន​លែង​នឹង​ដួល​ពី​ក្រោយ​រថយន្ត​ចោទ​ថា​រថយន្តបុក​

រាជធានីភ្នំពេញ ៖ ម៉ូតូសង់កូរ៉េពណ៌ក្រហម បើកបរដោយបុរសម្នាក់ ស្រវឹងជោកទប់ខ្លួនលែងនឹង បានទៅដួលក្រោយរថយន្តកាមរីបាឡែនពណ៌ស្ករ រួចហើយលើកម៉ូតូជិះដេញតាម ពាំងពីមុខរថយន្តដោយចោទប្រកាន់ថា បើកបុកម៉ូតូរបស់គាត់ដួលខូចខាត ។ គ្រោះថ្នាក់នេះកើតឡើង នៅវេលាម៉ោង៧ និង៤០នាទីយប់ថ្ងៃទី២៥ មេសា នៅចំណុចផ្លូវលេខ២៣០ កែងមហាវិថីម៉ៅសេទុង ស្ថិតក្នុងសង្កាត់ផ្សារដើមគ ខណ្ឌទួលគោក ។

ប្រភពព័ត៌មានពីអ្នកបើករថយន្តកាមរីបាឡែន ពណ៌ស្ករបានឱ្យដឹងថា មុនពេលកើតហេតុគាត់បើករថយន្តតាមមហាវិថីម៉ៅសេទុង ក្នុងទិសដៅពីត្បូងទៅជើង ស្របគ្នាជាមួយម៉ូតូសង់កូរ៉េពណ៌ក្រហម បើកដោយបុរសម្នាក់ស្រវឹងនៅពីក្រោយរថយន្តរបស់គាត់ ។ ខណៈមកដល់ចំណុចផ្លូវកែង មិនដឹងជាអ្នកជិះម៉ូតូប៉ះនឹងអ្វីទេ បានដួលពីក្រោយរថយន្ត រួចហើយស្រាប់តែបើកម៉ូតូមកស្ទាក់ពីមុខរថយន្តរបស់គាត់ ដោយចោទថារថយន្តបើកបុកម៉ូតូធ្វើឱ្យដួលវៀចកាង និងបែកកញ្ចក់ ។ហេតុការណ៍នេះធ្វើឱ្យភ្ញាក់ផ្អើលដល់សមត្ថកិច្ច និងអ្នកធ្វើដំណើរ តាមផ្លូវចោមរោមមើលកកកុញមួយសន្ទុះ ដោយបុរសស្រវឹងបានទាមទារសំណងមិនព្រមឈប់ ទើបម្ចាស់រថយន្តឱ្យលុយ២ម៉ឺនរៀលជាការបញ្ចប់រឿង ៕

បញ្ចូលអត្ថបទ ៖ ស្រីណា កោះ

ផ្តល់សិទ្ធដោយ កោះសន្តិភាព