កោះកុង៖ នៅខែក្រោយនេះ រដ្ឋាភិបាលនឹងផ្តល់សងវិញនូវថ្ងៃឈប់សម្រាករយៈពេល ៥ ថ្ងៃ ដោយមិនគិតថ្ងៃសៅរ៍ អាទិត្យបួនថ្ងៃទៀត ចំពោះបុណ្យចូលឆ្នាំខ្មែរដែលត្រូវបានផ្អាក់កាលពីខែមេសា។ ប៉ុន្តែ តើលោកអ្នកបានសម្រេចចិត្តទៅដើរលេងឯណាហើយឬនៅ? យើងសូមនាំលោកអ្នកទៅកម្សាន្តនៅឧទ្យានជាតិបទុមសាគរ ដែលស្ថិតនៅខេត្តកោះកុង។
ចូលរួមជាមួយពួកយើងក្នុង Telegram ដើម្បីទទួលបានព័ត៌មានរហ័សឧទ្យានជាតិបុទុមសាគរខេត្តកោះកុងដែលជាឧទ្យានជាតិធំជាងគេនៅលើផ្ទៃដី ១៧១ ០០០ ហិកតា។ ឧទ្យានដ៏ធំនេះគឺជាជម្រករបស់ប្រភេទសត្វព្រៃដែលជិតផុតពូជនៅលើពិភពលោកដែលរួមមានសត្វពង្រូល ខ្លាឃ្មុំធំ ខ្មាឃ្មុំតូច ភេ និងខ្លាត្រី។ វាក៏ជាតំបន់ទេសភាពដ៏ស្រស់ត្រកាលគួរឲ្យគយគន់ ជាមួយនឹងខ្យល់អាកាសជាទីមនោរម្យ ដែលធ្វើឲ្យលោកអ្នកស្ទើតែភ្លេចនូវខ្យល់អាកាសដ៏អាប់អួលនៅក្នុងទីក្រុង។
លោកអ្នកអាចមកលេងកន្លែងនេះបានតាមរយៈរមណីយដ្ឋានបោះតង់ Cardamom Tented Camp ដែលត្រូវបានបង្កើតឡើងដោយអង្គការសម្ព័ន្ធភាពសត្វព្រៃ (Wildlife Alliance) កាលពីឆ្នាំ ២០១៧ ស្ថិតនៅតាមដងព្រែកតាចាន់ នៅក្នុងព្រៃខៀវស្រងាត់។ ជាមួយនឹងកញ្ចប់តម្លៃ ១៧៥ ដុល្លារ លោកអ្នកអាចសម្រាកនៅរមនីយដ្ឋាននេះរយៈពេល ៣ ថ្ងៃ ២ យប់។
ស្តាប់មើលទៅ តម្លៃហាក់ដូចជាថ្លៃបន្តិច ប៉ុន្តែវាមានបូកបញ្ចូលនូវតង់តាមបែបសាហ្វារីដ៏ធំទូលាយមានអគ្គីសនីប្រើប្រាស់និងកង្ហារ អាហារនិងភេសជ្ជៈ (លើកលែងតែគ្រឿងស្រវឹង) ការជិះខ្សែរ៉ក់កាត់ព្រែកតាចាន់ ការជិះទូកកៃយ៉ាកតាមចិត្តចង់ ព្រមទាំងមគ្គុទេសទេសចរណ៍ដែលនាំលោកអ្នកដើរព្រៃផងដែរ។ លោកអ្នកអាចកក់កញ្ចប់ធ្វើដំណើរបានតាមរយៈអ៊ីមែល [email protected]។
ដើម្បីទៅកន្លែងនេះបាន លោកអ្នកត្រូវធ្វើដំណើរដោយរថយន្តតាមទិសអាគ្នេយ៍ពីភ្នំពេញឆ្ពោះទៅផ្លូវជាតិលេខ ៤ ទៅកាន់ខេត្តកោះកុងប្រហែល ៥ ម៉ោងហើយបត់ទៅផ្លូវលេខ ៤៨ ។ បន្ទាប់ពីប្រហែលមួយម៉ោងទៀតអ្នកនឹងទៅដល់កន្លែងមួយ ដែលជាកន្លែងដែលអ្នកត្រូវបានទទួលដោយមគ្គុទេសមួយក្រុមដែលនឹងនាំអ្នកទៅដល់ឧទ្យានតាមទូកមួយ។
មានរយៈពេលប្រហែល ២០ នាទីការជិះទូកកម្សាន្តគឺជាការចាប់ផ្តើមនៃដំណើរផ្សងព្រេងដ៏រំភើបមួយ។ នៅពេលទូកដើរនៅតាមដងទន្លេព្រែកតាចាន់អ្នកនឹងមានការភ្ញាក់ផ្អើលយ៉ាងខ្លាំងនៅពេលឃើញទេសភាពដូចជា ទន្លេដ៏ថ្លាជាមួយទឹកថ្លាខ្យង ព្រៃនៅទាំងសងខាងទន្លេ បក្សីព្រៃ និងសត្វព្រៃមានស្វានិងទោចជាដើម។
ពេលទៅដល់រមណីយដ្ឋានបោះតង់ Cardamom Tented Camp លោកអ្នកអាចចុះទៅមុជទឹកព្រែក ជិះខ្សែរ៉កកាត់ទន្លេ ឬចែវទូកកៃយ៉ាកតាមដងព្រែកយ៉ាងសប្បាយ។ ជាទូទៅ មិនមានមនុស្សច្រើនមកលេងកន្លែងនេះទេ ដោយសារតែមិនសូវមានអ្នកស្គាល់។ នៅថ្ងៃទីពីរ មគ្គុទេសទេសចរណ៍នឹងនាំលោកអ្នកដើរព្រៃក្នុងឧទ្យានជាតិ តែសកម្មភាពនេះតម្រូវឲ្យអ្នកមានកម្លាំងគ្រប់គ្រាន់ ព្រោះត្រូវចែវទូកនិងដើរឆ្ងាយត្រលប់មកវិញ។ បន្ទាប់ពីនេះ អ្នកអាចបន្តសកម្មភាពកម្សាន្តនានាដោយសេរី មុនពេលត្រលប់មកវិញនៅរសៀលថ្ងៃទីបី។
ការមកកម្សាន្តនៅកន្លែងនេះក៏អាចឲ្យលោកអ្នកសាងអំពើល្អ ផងដែរព្រោះថា តាមការឲ្យដឹងរបស់លោក Allan Michaud ជាប្រធានគ្រប់គ្រងនៅទីនេះ រមណីយដ្ឋានបោះតង់ Cardamom Tented Camp បានបង់វិភាគទានជាប្រាក់ខែ ២០ ភាគរយរបស់អនុរក្សសត្វព្រៃ និងព្រៃឈើនៅក្នុងឧទ្យានជាតិដែលជាអ្នកការពារធម្មជាតិពីការបំផ្លាញរបស់ព្រានព្រៃនិងអ្នកកាប់ឈើខុសច្បាប់៕