ចេះតែឆ្ងល់ថា ហាត់ដូចគេដែរ ម៉េចមិនឃើញស្រក ទម្ងន់ ឬឡើងសាច់ដុំសោះ តាមពិតហាត់ខុសអ៊ីចឹង សោះ!

អ្នកជំនាញខាងកាយសម្ព័ន្ធអាចធានាបានថា អ្នកអាចនឹងទទួលបានរាងស្អាតដោយមិនបាច់ចូលក្លិបលើកដុំដែក ឬហាត់អ្វីច្រើនឡើយ។ ហើយការហាត់ប្រាណដែលអាចធ្វើនៅផ្ទះបាន ដូចជា ការ Plank, Twists និង Squats គឺល្អបំផុតសម្រាប់រឿងនេះ។ ប៉ុន្តែពួកគេប្រហែលជាមើលតែភាពសាមញ្ញរបស់វាពេលដំបូងៗទេ តែធាតុពិត មនុស្សភាគច្រើនអនុវត្តវាមិនបានត្រឹមត្រូវឡើយ។ រឿងនេះមិនត្រឹមតែប៉ះពាល់ដល់ប្រសិទ្ធភាពរបស់វាទេ តែក៏អាចបង្កជាបញ្ហាសុខភាពថែមទៀតដែរ។ ខាងក្រោមនេះ ខ្ញុំសូមបង្ហាញអំពីកំហុសញឹកញាប់បំផុតដែលមនុស្សយើងអនុវត្តវិធីហាត់ប្រាណមូលដ្ឋានមិនបានត្រឹមត្រូវ ព្រមទាំងបង្ហាញអំពីគន្លឹះដែលត្រឹមត្រូវវិញ។ 

១. Plank

លំហាត់ប្រាណប្រភេទ Plank នេះ ខ្ញុំមិនដឹងថាពន្យល់ជាភាសាខ្មែរយើងយ៉ាងណាទើបត្រូវទេ តែអ្នកអាចមើលរូបភាពខាងលើនេះបាន។ វាគឺជាលំហាត់ប្រាណមូលដ្ឋានដ៏មានប្រសិទ្ធភាពមួយសម្រាប់ឲ្យរាងកាយទាំងមូលមានសកម្មភាពទាំងអស់។ ប៉ុន្តែការអនុវត្តវិធីហាត់ប្រាណបែបនេះមិនបានត្រឹមត្រូវ វាអាចបង្កជាបញ្ហាដល់ឆ្អឹងកងខ្នងបាន ជាពិសេសឆ្អឹងកងកតែម្តង។ 

២. Dips ឬការជ្រាត់ដៃយកសាច់ដុំដើមដៃខាងក្រោយ

នេះគឺជាលំហាត់ប្រាណមូលដ្ឋានមួយទៀតដែលមានប្រសិទ្ធភាពក្នុងការជំរុញដល់ការឡើងធំរបស់សាច់ដុំដើមដៃខាងក្រោយ និងផ្នែកខាងលើនៃរាងកាយ ហើយក៏សមស្របសម្រាប់អ្នកទើបតែហាត់ប្រាណដែរ ដោយសារតែវិធីហាត់មានលក្ខណៈងាយស្រួល។ តាមក្បួន លំហាត់ប្រាណយកសាច់ដុំដើមដៃនេះគួរតែធ្វើដោយមានការជួយពីកៅអី ប៉ុន្តែក្រោយពីអ្នកហាត់បានមួយរយៈហើយ អ្នកអាចធ្វើវានៅលើកម្រាលក៏បានដែរ។ ក្នុងករណីដែលអ្នកអនុវត្តលំហាត់ប្រាណបែបនេះខុសដូចរូបខាងលើវាអាចងាយនឹងមានរបួសបានដោយសារតែសាច់ដុំស្មាធ្វើការច្រើនជ្រុលពេក។ 

៣. Crunches 

លំហាត់ប្រាណបែប Crunches នេះមិនទាន់មានពាក្យខ្មែរណាដាក់ឲ្យត្រូវនៅឡើយទេ ប៉ុន្តែបងប្អូនអាចយល់បានតាមរយៈរូបភាពខាងលើនេះ។ ដើម្បីហាត់បានត្រឹមត្រូវ អ្នកគួរតែគេងនៅលើកម្រាល ហើយបត់ជង្គង់ ៩០ដឺក្រេ។ បន្ទាប់មកធ្វើការងើបស្មើនឹងដងខ្លួនឡើង ខណៈពេលដែលប្រើសាច់ដុំពោះដើម្បីលើក។ វាអាចមិនមានអ្វីស្មុគស្មាញច្រើនទេ ប៉ុន្តែមនុស្សភាគច្រើនមិនបានអនុវត្តវាត្រឹមត្រូវនោះទេ ជាក់ស្តែងដូចរូបភាពខាងលើនេះតែម្តង។ 

៤. អាហ្វង់កម្រិតស្រាល

 ការសិក្សាបានឲ្យដឹងថា ការអាហ្វង់កម្រិតស្រាលអាចជួយឲ្យសាច់ដុំរីកធំដូចគ្នា ប៉ុន្តែមិនចាំបាច់ធ្វើអ្វីខ្លាំងក្លាឡើយ។ វាអាចជាការអាហ្វង់ចេញពីជង្គង់ ឬម្រាមជើង ប៉ុន្តែអ្នកក៏អាចធ្វើវាពីលើជញ្ជាំង ឬសាឡុងបានដែរ។ អ្វីដែលជាកំហុសក្នុងពេលអាហ្វង់នោះគឺ ការធ្វើខ្លួនកោង និងខ្នងរាងជាងអក្សរ T។ ករណីបែបនេះងាយនឹងធ្វើឲ្យឆាប់រួយដល់សាច់ដុំស្មា ហើយសាច់ដុំដើមដៃ និងទ្រូងមិនសូវទទួលបានផលឡើយ។ 

៥. Squats ឬការអង្គុយចោងហោង

គ្រប់គ្នាដឹងហើយថា អ្នកមិនគួរណាលុតជង្គង់នឹងដីឡើយ ប៉ុន្តែវាគឺជាការឈរ ហើយទម្លាក់ខ្លួនចុះដូចអង្គុយចោងហោង ប៉ុន្តែមិនមែនចោងហោងតែម្តងទេ។ សំខាន់រូបភាពដែលធ្វើខុសខាងលើនេះ គួរតែកុំអនុវត្តអី ជាពិសេសការទាញជង្គង់ចូលគ្នាតែម្តង។ អ្នកខ្លះ ចូលចិត្តងើយក្បាលឡើងពេលអនុវត្តលំហាត់ប្រាណនេះ បែរជាធ្វើឲ្យឈឺចង្កេះ និងកទៅវិញ។ 

៦. Lunges

ចំពោះលំហាត់ប្រាណមួយនេះក៏មិនទាន់មានឈ្មោះខ្មែរដាក់នៅឡើយដែរ ប៉ុន្តែរូបភាពអាចពន្យល់បានហើយ។ បើសិនជាអ្នកអនុវត្តវិធីហាត់ប្រាណមួយនេះបានត្រឹមត្រូវ វានឹងជួយបង្កើនសាច់ដុំកំប៉េះគូថ និងសាច់ដុំភ្លៅខាងមុខបានយ៉ាងល្អ។ កំហុសដ៏ធំនៃការអនុវត្តវិធីហាត់ប្រាណមួយនេះគឺ ការរៀបដងខ្លួន និងជើងមិនបានត្រង់ ដែលជាហេតុធ្វើឲ្យលទ្ធផលមិនបានល្អប្រសើរចំពោះសាច់ដុំដែលត្រូវការ។ 

៧. Side Lunges

លំហាត់ប្រាណប្រភេទនេះនឹងជំរុញដល់សាច់ដុំភ្លៅខាងក្នុង។ វាគឺជាវិធីហាត់ប្រាណដ៏សាមញ្ញបំផុត ប៉ុន្តែការអនុវត្តមិនបានត្រឹមត្រូវ អាចផ្តល់ផលវិបាកដល់ឆ្អឹងកងខ្នង និងជង្គង់ ព្រមទាំងបន្ថយប្រសិទ្ធភាពរបស់វាថែមទៀត។ 

៨. The Boat Exercise

លំហាត់ប្រាណប្រភេទនេះក៏មិនទាន់មានឈ្មោះដាក់នៅឡើយដែរ ប៉ុន្តែវាគឺជាវិធីសាស្រ្តដ៏ល្អមួយក្នុងការពង្រឹងដល់តំបន់ឆ្អឹងកងខ្នងចង្កេះ ពង្រឹងដល់របត់ឈាមរត់ទៅសរីរាង្គក្នុងអាងត្រគាក និងបន្ថយការឈឺខ្នងបាន។ ប៉ុន្តែការហាត់មិនបានត្រឹមត្រូវ អាចធ្វើឲ្យសាច់ដុំខ្នងធ្វើការកាន់តែខ្លាំង ហើយអាការៈកាន់តែធ្ងន់ធ្ងរថែមទៀត៕