ត្រឹមតែរយៈពេល ២៤ ម៉ោង ប្រទេសហ្វីលីពីនមានអ្នកឆ្លងជំងឺកូវីដ-១៩ ថ្មី ជាង ២,០០០ករណី

ក្រុងម៉ានីល៖ ទីភ្នាក់ងារសារព័ត៌មានចិនស៊ីនហួរបានរាយការណ៍នៅថ្ងៃទី ២៤ ខែកក្កដានេះថា ករណីជំងឺ COVID-១៩ នៅក្នុងប្រទេសហ្វីលីពីនបានកើនឡើងដល់ ៧៦,៤៤៤ នាក់បន្ទាប់ពីក្រសួងសុខាភិបាលហ្វីលីពីន (DOH) បានរាយការណ៍ពីករណីថ្មីនៃជំងឺនេះចំនួន ២,១០៣ ករណីបន្ថែមទៀត ។

DOH បាននិយាយថា ចំនួននៃការជាសះស្បើយបានកើនឡើងបន្ថែមទៀតផងដែររហូតដល់ ២៤,៥០២ នាក់បន្ទាប់ពីអ្នកជំងឺ ១៤៤ នាក់ទៀតបានជាសះស្បើយឡើងវិញ។ ផ្ទុយមកវិញចំនួនអ្នកស្លាប់ក៏កើនឡើងដល់ ១,៨៧៩ នាក់ បន្ទាប់ពីអ្នកជំងឺ ១៥ នាក់បន្ថែមទៀតបានស្លាប់ដោយសារជំងឺនេះ។

 ជាការកត់សម្គាល់ ករណីភាគច្រើនបានកើតឡើងនៅទីក្រុងម៉ានីល និងខេត្ត Cebu ភាគកណ្តាលប្រទេសហ្វីលីពីន។ ទីក្រុងម៉ានីលបានរាយការណ៍ថាមានករណីថ្មីចំនួន ១,២៧២ ករណីកាលពីថ្ងៃសុក្រ។ DOH បានបន្ថែមថា មន្ទីរពិសោធន៍ចំនួន ៩១ កន្លែងត្រូវបានបង្កើតឡើងនៅទូទាំងប្រទេសដែលមានសមត្ថភាពធ្វើតេស្តរកជំងឺ COVID-១៩ លើមនុស្សប្រមាណ ១,២ លាននាក់ហើយចាប់តាំងពីការផ្ទុះឡើង។ 

DOH ក៏បាននិយាយ ថាចាប់ពីការធ្វើតេស្តប្រចាំថ្ងៃចំនួន ៣០០ ដងក្នុងខែមីនា ឥឡូវនេះខ្លួនអាចធ្វើតេស្តបាន ២៤,០០០ ដងជារៀងរាល់ថ្ងៃ។ នៅចុងខែនេះ DOH បាននិយាយថា គោលដៅរបស់ខ្លួនគឺបង្កើនការធ្វើតេស្តឈានដល់ប្រជាជន ១,៥ លាននាក់។

យោងតាម ​​DOH ដដែល អត្រាវិជ្ជមាននៃការធ្វើតេស្តរបស់ប្រទេសឬភាគរយនៃប្រជាជនដែលមានលទ្ធផលវិជ្ជមានបានធ្លាក់ចុះស្ទើរតែ ១០% គឺពី ២២,២% នៅថ្ងៃទី ៣០ ខែមេសាមកនៅត្រឹម ១២,៦% នៅថ្ងៃទី ២០ ខែកក្កដានេះ។

គួរបញ្ជាក់ដែរថា រដ្ឋាភិបាលមានគោលបំណងធ្វើតេស្តលើមនុស្សចំនួន ១០ លាននាក់ឬប្រហែលមួយភាគដប់នៃចំនួនប្រជាជនសរុបនៅឆ្នាំ ២០២១ ៕

ប្រភព៖ ទីភ្នាក់ងារសារព័ត៌មានស៊ីនហួរ